جھارکھنڈ میں سرکاری ملازمت کی بہار، جلد آئے گی ڈھائی لاکھ ویکنسی

جھارکھنڈ کے وزیر اعلیٰ ہیمنت سورین نے ریاست کے سرکاری محکموں میں خالی عہدوں پر تقرری کا عمل تیز کرنے کے لیے آئندہ 31 اکتوبر تک سبھی محکموں کی تقرری ضابطے تیار کرنے اور اشتہار شائع کرنے کی ہدایت دی ہے۔ انھوں نے افسران سے کہا ہے کہ خالی عہدوں پر تقرری حکومت کی سب سے بڑی ترجیح ہے۔ اب اس میں کسی طرح کی تاخیر نہیں ہونی چاہیے۔

واضح رہے کہ جھارکھنڈ حکومت نے سال 2021 کو ’تقرری سال‘ قرار دیا ہے۔ ریاست کے مختلف سرکاری محکموں میں ڈھائی لاکھ سے زیادہ عہدے خالی ہیں۔ وزیر اعلیٰ ہیمنت سورین نے آج مختلف محکموں کے افسران کے ساتھ میٹنگ کی اور خالی عہدوں پر تقرری سے جڑی تکنیکی پریشانیوں کو دور کرنے پر غور و خوض کیا۔

وزیر اعلیٰ نے کہا کہ پرسونل، ایڈمنسٹریٹو سدھار اور راج بھاشا محکمہ، دیگر سبھی محکمہ، جھارکھنڈ پبلک سروس کمیشن اور جھارکھنڈ ملازمین الیکشن کمیشن آپس میں بہتر کوآرڈنیشن قائم کریں تاکہ تقرری کا عمل رخنہ انداز نہ ہو۔ کسی بھی محکمہ کی جانب سے تقرریوں کو زیر التوا نہ رہنے دیا جائے۔ ریاستی حکومت کی منشا ہے کہ زیادہ سے زیادہ نوجوانوں کو روزگار ملے اور تقرری عمل کسی بھی سطح پر نہ رکے۔

وزیر اعلیٰ ہیمنت سورین نے کہا کہ 31 اکتوبر 2021 سے پہلے ہی سبھی محکمہ تقرری اور سروس شرائط سے متعلق ضابطوں میں جتنی بھی خرابیاں ہیں، انھیں دور کریں۔ آج کی میٹنگ میں چیف سکریٹری، سبھی ایڈیشنل چیف سکریٹری، پرنسپل سکریٹری، سکریٹری اور سبھی محکماتی سربراہ موجود تھے۔