بھارت جوڑو یاترا: 33 بھارت یاتریوں نے آنکھ عطیہ کرنے کا کیا عزم، اسپتال پہنچ کر کیا وعدہ

کانگریس کے سابق صدر اور رکن پارلیمنٹ راہل گاندھی کی قیادت میں بھارت جوڑو یاترا جوش و خروش سے اپنی منزل کی طرف بڑھ رہی ہے۔ اس میں شامل 33 افراد یعنی بھارت یاتریوں نے میسور میں اپنی آنکھ عطیہ کرنے کے لیے عزائم نامہ بھرا ہے۔ ان میں سب سے زیادہ پانچ اراکین ریاست مدھیہ پردیش سے شامل ہیں۔ انھوں نے جے ایس ایس اسپتال، میسور پہنچ کر آنکھ عطیہ کرنے کا وعدہ کیا ہے۔

بتایا جا رہا ہے کہ آنکھ عطیہ کرنے کا وعدہ کرنے والوں میں مدھیہ پردیش کی سنگیتا کانکریا، پریش ناگر، اویناش گپتا، اجئے پٹیل، اونی بنسل شامل ہیں۔ انھوں نے اس موقع پر کہا کہ آنکھ عطیہ کرنا کارِ ثواب ہے اور اس سے کسی کی زندگی بہتر ہو سکتی ہے۔

واضح رہے کہ راہل گاندھی کی قیادت میں کانگریس کی بھارت جوڑو یاترا کا آج 36واں دن ہے۔ اس یاترا میں اب تک 925 کلومیٹر سے زیادہ کا سفر مکمل ہو چکا ہے۔ یاترا کے 36ویں دن کی شروعات آج کرناٹک کے چتردرگ ضلع کے بوماگونڈاناہلی سے ہوئی تھی۔ تمل ناڈو کے کنیاکماری سے شروع ہوئی راہل گاندھی کی یہ یاترا 12 ریاستوں سے ہوتے ہوئے کشمیر میں جا کر ختم ہوگی۔