بنگال بی جے پی میں بھگدڑ کی حالت، کئی لیڈران ترنمول کے رابطے میں: کنال گھوش

کولکاتا: مغربی بنگال اسمبلی انتخابات میں ترنمول کی کامیابی کے بعد بی جے پی میں بھگدڑ مچی ہوئی ہے۔ ترنمول کانگریس کے ریاستی سکریٹری کنال گھوش نے دعویٰ کیا ہے کہ کئی بی جے پی لیڈران ترنمول کانگریس کے رابطے میں ہیں۔ کنال گھوش نے یہ بھی دعویٰ کیا ہے کہ انتخابات سے قبل ترنمول کانگریس کو چھوڑ کر بی جے پی میں شامل ہونے والے قائدین اب میل اور واٹس ایپ کے ذریعہ ترنمول کانگریس میں واپس آنے کی اپیل کر رہے ہیں۔ بنگال ترنمول کے جنرل سکریٹری کنال گھوش کا کہنا ہے کہ پارٹی سپریمو ممتا بنرجی اس بارے میں حتمی فیصلہ کریں گی۔

مکل رائے اور ان کے بیٹے شبھرنشو رائے بی جے پی چھوڑ کر ترنمول میں شامل ہوگئے ہیں۔ راجیو بنرجی، سونالی گوہا، سرلا مرمو جیسے ترنمول چھوڑنے والے لیڈران سمیت متعدد قائدین ترنمول میں واپسی کی التجا کر رہے ہیں۔ ایسی صورتحال میں کنال گھوش کا بیان بہت اہم سمجھا جاتا ہے۔ تاہم ترنمول کے حامی بھی ان رہنماؤں کی واپسی کی مخالفت کر رہے ہیں۔

کنال گھوش نے کہا کہ جو لوگ پارٹی میں واپس آنا چاہتے ہیں وہ میل اور واٹس ایپ کر رہے ہیں۔ ایسا نہیں ہے کہ سب کو واپس لے لیا جائے گا۔ کس کو واپس لیا جائے گا، اس تعلق سے ممتا بنرجی فیصلہ کریں گی، لیکن ترنمول کانگریس کے کارکن کو اہمیت دی جائے گی اور ان کے فیصلے کو اہمیت دی جائے گی۔