عتیق احمد کی بیوی شائستہ پروین کو اب تک نہیں پکڑ سکی پولیس، مفرور قرار دینے کے بعد گھر پر نوٹس چسپاں

اتر پردیش پولیس کئی مہینوں سے غائب عتیق احمد کی بیوی شائستہ پروین کو تلاش کر رہی ہے، لیکن اسے کامیابی نہیں مل سکی ہے۔ اب پولیس نے شائستہ کو مفرور (بھگوڑی) قرار دے دیا ہے اور اس کے گھر پر نوٹس بھی چسپاں کر دیا ہے۔ میڈیا رپورٹس کے مطابق 50 ہزار روپے کی انعامی شائستہ کے گھر کی پولیس نے قرقی کی ہے، حالانکہ یہ مکان کسی دوسرے کے نام پر ہے۔ امیش پال قتل معاملہ کے بعد اسے بلڈوزر کے ذریعہ منہدم کیا جا چکا ہے۔

قابل ذکر ہے کہ اتر پردیش کے مافیا عتیق احمد اور اس کے بھائی اشرف کی موت سے پہلے سے ہی شائستہ پروین غائب ہے۔ عتیق کے جنازے میں بھی شائستہ شامل نہیں ہوئی تھی۔ پولیس نے اس کی خبر دینے والوں کو انعام دینے کا بھی اعلان کیا، لیکن اس کا بھی کوئی فائدہ نہیں ملا۔ پولیس شائستہ کے ساتھ ساتھ اشرف کی بیوی زینب کی بھی تلاشی کر رہی ہے، لیکن دونوں ہی پولیس کی گرفت سے دور ہیں۔

میڈیا رپورٹس کے مطابق عتیق احمد کی بے نامی ملکیت کو لے کر لکھنؤ کے ایک ہوٹل میں کوئی بڑا معاہدہ ہونے والا تھا جس کو لے کر پولیس نے اس ہوٹل میں چھاپہ ماری کی تھی۔ اس چھاپہ ماری میں عتیق احمد کا وکیل وجئے مشرا پولیس کی گرفت میں آ گیا۔ اس نے پوچھ تاچھ میں کچھ اہم انکشافات کیے ہیں۔ پولیس کو وکیل وجئے مشرا سے پتہ چلا کہ شائستہ اور زینب معاشی بحران کا شکار ہو گئی ہیں اور انھیں پیسوں کی سخت ضرورت تھی۔ یہی وجہ ہے کہ ہوٹل میں بے نامی ملکیتوں کو فروخت کرنے کا معاہدہ وکیل کے ذریعہ کرایا جا رہا تھا۔ دونوں ان ملکیتوں کو فروخت کر ملک سے باہر نکل جانے کی کوشش میں ہیں۔