دہلی کا آشرم انڈر پاس عام لوگوں کے لئے کھول دیا گیا، روزانہ 1550 لیٹر ایندھن کی بچت ہونے کی امید

نئی دہلی: قومی راجدھانی دہلی کے آشرم انڈر پاس کو اتوار کے روز عام ٹریفک کے لیے کھول دیا گیا۔ دہلی کے نائب وزیر اعلیٰ منیش سسودیا نے اتوار کی صبح آشرم چوک پر منعقدہ ایک پروگرام میں انڈر پاس کو عوام کے لیے وقف کیا۔ تقریب سے خطاب کرتے ہوئے انہوں نے کہا کہ اس انڈر پاس سے روزانہ تقریباً 1550 لیٹر ایندھن کی بچت ہوگی جو کہ بھاری ٹریفک کی وجہ سے ضائع ہو جاتا تھا۔

انہوں نے کہا ’’ایک اندازے کے مطابق یہاں بھاری ٹریفک کی وجہ سے روزانہ تقریباً 1550 لیٹر ایندھن ضائع ہوتا تھا۔ اس انڈر پاس کا سب سے اہم فائدہ یہ ہے کہ اس سے قدرتی ایندھن اور عوام کا وقت دونوں کی بچت ہوگی۔" انہوں نے مزید کہا کہ بھاری ٹریفک نے چوک پر روزانہ 3601 کلوگرام کاربن ڈائی آکسائیڈ کے اخراج میں بھی حصہ ڈالا ہے، جسے اب روکا جا سکتا ہے۔

سسودیا نے کہا کہ آلودگی کے نقطہ نظر سے یہ ایک قابل ذکر کامیابی ہے اور انڈر پاس شہر میں سڑکوں اور ٹریفک کو ہموار کرنے میں ایک قدم آگے ہے۔ انہوں نے کہا کہ "اس انڈر پاس کا اصل افتتاح تو 22 مارچ کو عوام نے ہی کر دیا تھا اور انڈر پاس کو وقف کرنے کے لیے اب صرف رسمی تقریب منعقد ہو رہی ہے۔"

خیال رہے کہ 750 میٹر لمبے انڈر پاس پر تعمیراتی کام دسمبر 2019 میں شروع ہوا تھا اور اب تک آٹھ ڈیڈ لائنز گزر چکی ہیں، جس کی وجہ سے شہر کے سب سے زیادہ ٹریفک والے حصوں میں سے ایک میں مسلسل ٹریفک جام رہتا ہے۔ آشرم چوراہا متھرا روڈ پر نظام الدین اور بدر پور کے درمیان انڈر پاس سگنل فری سفر فراہم کرے گا۔