کیا آتشی کے وزیر اعلیٰ بنتے ہی اروند کیجریوال ہوئے بے گھر؟ رہائش کی تلاش شروع

عام آدمی پارٹی کی رہنما آتشی نے دہلی کی وزیراعلیٰ کے طور پر اپنا عہدہ باضابطہ سنبھال لیا ہے۔ اب انہیں جلد ہی سول لائنس واقع وزیراعلیٰ رہائش گاہ شفٹ ہونا پڑے گا۔ اس طرح اب سابق وزیر اعلیٰ اروند کیجریوال کو اپنی سرکاری رہائش گاہ خالی کرنی پڑے گی۔ اس سلسلے میں عآپ نے پارٹی کنوینر اور سابق وزیراعلیٰ اروند کیجریوال کے لیے سرکاری رہائش کا مطالبہ مرکزی حکومت سے کیا ہے۔

ابھی تک یہ طے نہیں ہوا ہے کہ اروند کیجریوال کب وزیر اعلیٰ کا اپنا گھر خالی کریں گے اور کہاں شفٹ ہوں گے۔ اس معاملے میں عآپ ایم پی راگھو چڈھا الیکشن کمیشن کے ضابطوں کا حوالہ دیتے ہوئے مرکزی حکومت سے سابق وزیراعلیٰ کے لیے رہائش مہیا کرانے کا مطالبہ دو دن پہلے ہی کر چکے ہیں۔

راگھو چڈھا نے کہا کہ کمیشن کے ضابطوں کے مطابق کسی بھی قومی پارٹی کو قومی دفتر اور قومی سطح کی پارٹی کے قومی کنوینر کو سرکاری رہائش دیا جاتا ہے۔ ہم مرکزی حکومت سے مطالبہ کرتے ہیں کہ اروند کیجریوال کو سرکاری رہائش مہیا کرائی جائے۔ انہوں نے کہا کہ پہلے کیجریوال کوشامبی میں رہتے تھے۔ 2013 میں وزیر اعلیٰ بننے کے بعد وہ تلک لین واقع گھر میں رہے۔ پھر 2015 کے اسمبلی انتخابات میں کامیابی کے بعد وہ سول لائنس علاقے میں 6 فلیگ اسٹاف روڈ واقع گھر میں رہنے لگے۔

مرکزی حکومت کی طرف سے اس سے متعلق ابھی تک کوئی سرکاری تصدیق نہیں کی گئی ہے کہ کیجریوال کو سی ایم ہاؤس خالی کرنے کے بعد رہنے کے لیے کہاں اور کون سا گھر دیا جائے گا۔ ذرائع کے مطابق انہیں 10 فیروز شاہ روڈ میں شفٹ کیا جا سکتا ہے۔

غور طلب رہے کہ اروند کیجریوال دہلی آبکاری پالیسی معاملے میں 13 ستمبر کو سپریم کورٹ سے ضمانت ملنے کے بعد تہاڑ جیل سے رہا ہو گئے تھے۔ اس کے بعد انہوں نے 15 ستمبر کو اعلان کیا کہ دو دن بعد میں اپنے عہدہ سے استعفیٰ دے دوں گا اور 17 ستمبر کو انہوں نے ایسا ہی کرتے ہوئے دہلی وزیراعلیٰ کے عہدے سے استعفیٰ دے دیا۔