’آپ جسے چاہیں جیل بھیج دیں‘، کیجریوال نے پی ایم مودی کو دیا چیلنج، عآپ لیڈران کل 12 بجے پہنچیں گے بی جے پی دفتر
عآپ کنوینر اروند کیجریوال نے مرکز کی مودی حکومت پر الزام عائد کیا کہ وہ عآپ لیڈران کو جیل بھیجنا چاہتے ہیں، ساتھ ہی انھوں نے دعویٰ کیا کہ عآپ لیڈران کو جیل بھیج کر ان کی پارٹی کو کچلا نہیں جا سکتا۔
اروند کیجریوال، ویڈیو گریب
دہلی کے وزیر اعلیٰ اروند کیجریوال نے ہفتہ کے روز میڈیا کو جانکاری دیتے ہوئے بتایا کہ وہ اور دیگر عآپ لیڈران 19 مارچ یعنی اتوار کے روز بی جے پی ہیڈکوارٹر جائیں گے تاکہ وزیر اعظم جسے چاہیں اسے جیل بھیج سکیں۔ انھوں نے پارٹی کی رکن پارلیمنٹ سواتی مالیوال پر مبینہ حملے کے سلسلے میں اپنے معاون بیبھو کمار کی گرفتاری کے کچھ گھنٹوں بعد ایک پریس کانفرنس میں دعویٰ کیا کہ بی جے پی کہہ رہی ہے کہ وہ عآپ رکن پارلیمنٹ راگھو چڈھا اور دہلی کے وزراء سوربھ بھاردواج اور آتشی کو بھی جیل بھیجیں گے۔
عآپ کے قومی کنوینر کیجریوال کا کہنا ہے کہ ان کے لیڈروں کو جیل بھیج کر ان کی پارٹی کو کچلا نہیں جا سکتا۔ پی ایم مودی پر منیش سسودیا، ستیندر جین اور سنجے سنگھ جیسے عآپ لیڈران کو جیل بھیجنے کا ’کھیل‘ کھیلنے کا الزام عائد کرتے ہوئے کیجریوال نے کہا کہ ’’میں اپنے اراکین اسمبلی اور اراکین پارلیمنٹ کے ساتھ کل دوپہر بی جے پی ہیڈکوارٹر جاؤں گا تاکہ وزیر اعظم جسے چاہیں جیل بھیج سکیں۔‘‘ ساتھ ہی انھوں نے یہ بھی کہا کہ ’’عآپ ایک سوچ ہے۔ آپ جتنے عآپ لیڈران کو جیل میں ڈالیں گے، ملک ان سے 100 گنا زیادہ لیڈر پیدا کرے گا۔‘‘
کیجریوال نے دعویٰ کیا کہ عآپ کی ’غلطی‘ یہ تھی کہ دہلی میں اس کی حکومت نے اچھے اسکول بنائے، محلہ کلینک قائم کیے، مفت علاج مہیا کرایا اور شہر میں 24 گھنٹے مفت بجلی فراہمی کو یقینی بنایا، اور ایسا کرنے میں بی جے پی ناکام رہی۔
واضح رہے کہ مبینہ دہلی آبکاری پالیسی گھوٹالہ سے جڑے منی لانڈرنگ معاملے میں گرفتار کیے گئے کیجریوال کو لوک سبھا انتخاب میں تشہیر کرنے کے لیے سپریم کورٹ نے یکم جون تک عبوری ضمانت دی ہے۔ انھیں عام انتخاب کے آخری مرحلہ کی ووٹنگ کے ایک دن بعد، یعنی 2 جون کو خود سپردگی کرنی ہوگی اور واپس جیل جانا ہوگا۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔