اے پی: کورونا کے آزمائشی ٹیکے 28 اور 29 دسمبر کو لگائے جائیں گے

حیدرآباد: ہندوستان میں کورونا وائرس کی ٹیکہ کاری کا آغاز شروع ہونے والا اور اس کے لئے تمام تیاریاں مکمل کرلی گئی ہیں۔ اس ضمن میں مرکزی حکومت کی طرف سے ملک بھر میں تربیتی پروگرام چلا کر ٹیکہ لگانے کے حوالہ سے اہلکاروں کو ضروری معلومات فراہم کی جا رہی ہیں۔

آندھرا پردیش میں ضلع کرشنا سے آزمائشی ٹیکہ لگانے کی شروعات کی جائے گی۔ خبر رساں ایجنسی یو این آئی کے مطابق اے پی کے ضلع کرشنا سے دسمبر کی 28 اور 29 تاریخ کو آزمائشی ٹیکے لگائے جانے کا آغاز کیا جائے گا۔ آزمائشی ٹیکے لگانے کی شروعات کرنے کے لئے ضلعی عہدیدار ضروری انتظامات کر رہے ہیں۔

اس ماہ کی 28 تاریخ کو کرشنا ضلع کے 6 سرکاری اسپتالوں اور میڈیکل کالجوں میں کورونا ٹیکہ آزمائشی طور پر لگایا جائے گا۔ اس کے لئے محکمہ صحت کے عہدیداروں نے اے این ایم اور آشا ورکرس تیاری کر رہی ہیں۔ ان ٹیکوں کے لئے پانچ مقامات کی نشاندہی کی گئی ہے، جن میں گورنمنٹ اسپتال وجئے واڑہ، اوکنور پی ایچ سی، پورنا پرائیویٹ اسپتال، اربن یو پی ایچ سی اور ایک سرکاری اسکول کا انتخاب کیا گیا۔

ہر سنٹر کے لئے 25 استفادہ کنندگان کا انتخاب کیا گیا ہے جن کو یہ ٹیکہ لگایا جائے گا۔ حکومت نے ریاست میں پہلے مرحلہ میں ایک کروڑ افراد کو کورونا کے ٹیکے لگائے جانے کا فیصلہ کیا گیا ہے۔ سب سے پہلے 3.6 لاکھ طبی اہلکار کو یہ ٹیکہ لگایا جائے گا۔

ساتھ ہی ان 7 لاکھ فرنٹ لائن ورکرس کو بھی یہ ٹیکہ لگایا جائے گا جو کورونا کے خلاف لڑائی میں پیش پیش رہے۔ اس کے علاوہ ڈاکٹروں، پولیس اہلکاوں، سرکاری و پرائیویٹ اسپتالوں میں اہلکاروں کو یہ ٹیکہ لگایا جائے گا۔ بعد ازاں 50 برس کی عمر کے تقریباً 90 لاکھ افراد کو یہ ٹیکہ لگایا جائے گا۔