اڈیشہ کے بالاسور میں پھر ہونے والا تھا ٹرین حادثہ، اسٹیشن ماسٹر اور پوائنٹ مین کی معطلی کا حکم

اڈیشہ کے بالاسور ضلع میں گزشتہ مہینے ہوئے ٹریپل ٹرین حادثہ میں سینکڑوں لوگوں کی موت کے بعد بھی لگتا ہے کہ ریلوے نے سبق نہیں لیا ہے، کیونکہ منگل کو ایک بار پھر تقریباً اسی جگہ پر ایک اور مسافر ٹرین حادثہ کا شکار ہوتے ہوتے بچی۔ اس معاملے میں غلطی کے لیے ایک اسٹیشن ماسٹر اور پوائنٹ مین کو معطل کر دیا گیا ہے۔

افسران نے بدھ کے روز اس سلسلے میں جانکاری دیتے ہوئے بتایا کہ منگل کو بھدرک سے بالاسور جا رہی ایک میمو ٹرین غلطی سے نیلگری اسٹیشن کے پاس لوپ لائن ٹریک میں گھس گئی جہاں رکھ رکھاؤ کا کام چل رہا تھا۔ خوش قسمتی سے لوکو پائلٹ نے غلطی کا پتہ چلتے ہی فوراً بریک لگا دیا جس سے بڑا حادثہ ہونے سے بچ گیا۔

میمو ٹرین کے لوکو پائلٹ نے کہا کہ ٹرین 7 سے 8 کلومیٹر فی گھنٹے کی رفتار سے چل رہی تھی اور ٹریک ٹھیک سے سیٹ نہیں تھا۔ ٹرین کے پٹری سے اترنے کا کوئی امکان نہیں تھا، لیکن پٹریاں متاثر ہو سکتی تھیں اور پوائنٹ ٹوٹ سکتا تھا۔ تقریباً ایک گھنٹے تک سائٹ پر رکنے کے بعد ٹرین نے بالاسور کی طرف اپنا سفر دوبارہ شروع کیا۔

ریلوے کے ایک سینئر افسر نے کہا کہ اس معاملے میں غلطی کے لیے نیلگری ریلوے اسٹیشن کے پوائنٹ مین اور اسٹیشن ماسٹر کو معطل کر دیا گیا ہے۔ یہ حادثہ بہناگا بازار اسٹیشن سے تقریباً 15 کلو میٹر دور کا بتایا گیا ہے جہاں 2 جون کی شام کو ٹریپل ٹرین حادثہ ہوا تھا۔ اس حادثہ میں کم از کم 293 لوگ ہلاک ہو گئے تھے جبکہ ہزاروں افراد زخمی ہوئے تھے۔