تاؤتے کے بعد ایک اور گردابی طوفان کی پیش قدمی، بنگال اور اڈیشہ کے ساحلوں سے ٹکرانے کا خدشہ

نئی دہلی: ہندوستانی محکمہ موسمیات (آئی ایم ڈی) نے خدشہ ظاہر کیا ہے کہ طوفان تاؤتے کے بعد ایک اور گردابی طوفان مغربی بنگال اور اوڈیشہ کے ساحلوں سے ٹکرا سکتا ہے۔ محکمہ موسمیات کے مطابق 22 مئی کے قریب شمالی بحیرہ انڈمان اور اس سے ملحقہ خلیج شمال وسطی بنگال کے اوپر ایک کم دباؤ کا علاقہ پیدا ہونے کا امکان ہے۔ اس کے بعد آئندہ 72 گھنٹوں کے دوران رفتہ رفتہ تیز ہو کر اس کے گردابی طوفان میں تبدیل ہونے کا خدشہ ہے۔

محکمہ موسمیات نے مزید کہا کہ یہ گردابی طوفان شمال مغرب کی جانب پیش قدمی کرتے ہوئے 26 مئی کی شام کے قریب مغربی بنگال اور اوڈیشہ کے ساحلوں تک پہنچ سکتا ہے۔ جنوب مغربی مانسون کے 21 مئی کے قریب بحیرہ انڈمان اور جنوب مغربی بنگال کی خلیج تک بر وقت پہنچنے کی توقع ہے۔

خیال رہے کہ گردابی طوفان تاؤتے نے ہندوستان میں کافی تباہی مچائی ہے۔ وزیر اعظم نریندر مودی نے اس سے ہونے والے نقسان کا جائزہ لینے کے لئے بدھ کے روز گجرات اور مرکز کے زیر انتظام علاقہ دیو میں متاثرہ علاقوں کا فضائی معائنہ کیا۔ گجرات کے وزیر اعلیٰ وجے روپانی نے ٹوئٹ کیا، ’’وزیر اعظم نریندر مودی بھاونگر پہنچ گئے ہیں۔ وہ گردابی طوفان سے متاثرہ امریلی، گیر، سومناتھ اور بھاونگر اضلاع کا فضائی معائنہ کریں گے۔‘‘

محکمہ موسمیات نے پیش گوئی کی ہے کہ اس مرتبہ مانسون قبل از وقت آ سکتا ہے۔ جمعہ کے روز محکمہ موسمیات نے کہا کہ کیرالہ میں جنوب مغربی مانسون قبل از وقت 31 مئی کو پہنچ سکتا ہے۔ عموماً ریاست میں مانسون یکم جون کو آتا ہے۔ اس مرتبہ مانسون کے حسب معمول رہنے کی بھی پیش گوئی کی گئی ہے۔