اتراکھنڈ کے وزیر اعلیٰ کی یقین دہانی کے بعد انکیتا کی آخری رسومات ادا

سری نگر: انکیتا بھنڈاری کی لاش کو سری نگر، پوڑی گڑھوال کے مردہ خانے سے این آئی ٹی گھاٹ لے جایا گیا، جہاں انکیتا کی آخری رسومات ادا کی گئیں۔ وہیں اس سے قبل انکیتا کی پوسٹ مارٹم رپورٹ کو لے کر مشتعل لوگوں نے بدری ناتھ رشی کیش ہائی وے کو بلاک کر دیا تھا۔ بتایا جا رہا ہے کہ انکیتا کے گھر والے پوسٹ مارٹم کی رپورٹ سے مطمئن نہیں تھے اور اہل خانہ نے آخری رسومات ادا کرنے سے انکار کر دیا تھا۔

اتراکھنڈ کے وزیر اعلیٰ دھامی اور ضلع انتظامیہ کے سمجھانے پر آخر کار اہل خانہ آخری رسومات کے لیے تیار ہو گئے جس کے بعد سری نگر کے آئی ٹی آئی گھاٹ میں انکیتا بھنڈاری کی آخری رسومات ادا کر دی گئیں۔ اس دوران انکیتا کو الوداع کرنے کے لیے گھاٹ پر کافی بھیڑ جمع ہوگئی۔

وزیر اعلیٰ پشکر سنگھ دھامی نے کہا ہے کہ انکیتا بھنڈاری قتل کیس کی سماعت فاسٹ ٹریک کورٹ میں کی جائے گی اور حکومت کی طرف سے متاثرہ خاندان کی ہر ممکن مدد کی جائے گی۔ انہوں نے کہا کہ جو بھی اس گھناؤنے جرم میں ملوث ہوگا اسے سخت ترین سزا دی جائے گی۔ ایس آئی ٹی معاملے کی جانچ کر رہی ہے۔ انہوں نے لوگوں سے تحقیقات میں تعاون کرنے کی اپیل کی۔ انہوں نے کہا کہ بیٹی کے ساتھ ایسا واقعہ پیش آیا ہے۔ ایسے میں لوگوں کا ناراض ہونا فطری بات ہے۔