انکتا بھنڈاری قتل واقعہ: ملزم پلکت کا پورا کنبہ لوگوں کا غصہ دیکھ کر دہشت میں، سبھی گھر چھوڑ کر غائب

اتراکھنڈ کے رشی کیش میں ایک ریسورٹ کی رسپشنسٹ انکتا بھنڈاری کے قتل کے بعد لوگوں میں پیدا غصے کو دیکھتے ہوئے اہم ملزم اور بی جے پی لیڈر کے بیٹے پلکت آریہ کا پورا کنبہ ہریدوار سے کہیں غائب ہو گیا ہے۔ دراصل ہریدوار میں بھی لوگ لگاتار ان کے خلاف مظاہرہ کر رہے ہیں اور ملزمین کی پھانسی کا مطالبہ کر رہے ہیں۔

انکتا قتل واقعہ میں ریاستی حکومت بھی لگاتار لوگوں سے کہہ رہی ہے کہ اس معاملے میں ذرا بھی نرمی نہیں برتی جائے گی اور جو قصوروار ہوں گے ان کے خلاف سخت سے سخت کارروائی کی جائے گی، لیکن لوگوں کا غصہ کم ہونے کا نام نہیں لے رہا ہے۔ ان سب کے درمیان پلکت آریہ کا پورا کنبہ ہریدوار سے کہیں غائب ہو گیا ہے، جس کے بعد ان کے گھر پر سناٹا پسرا ہوا ہے۔

پلکت کے والد، بھائی اور گھر کے دیگر اراکین گھر میں تالا لگا کر کہیں چلے گئے ہیں۔ حالانکہ ابھی تک ایس آئی ٹی یا مقامی پولیس ان کے گھر نہیں پہنچی ہے۔ لیکن لوگوں کے احتجاج اور خوف کے درمیان پورا کنبہ کہاں گیا ہے، اس کا پتہ نہیں چل سکا ہے۔ پلکت کے گھر والوں کو بار بار یہ لگ رہا تھا کہ ان کے گھر کو بھی نشانہ بنایا جا سکتا ہے۔ ایسے میں پورا کنبہ وقت رہتے علاقہ سے نکل گیا۔

بتایا جا رہا ہے کہ انکتا قتل واقعہ میں بنائی گئی ایس آئی ٹی ہریدوار میں بھی ملزم کے گھر والوں سے پوچھ تاچھ کر سکتی ہے۔ اس کے ساتھ ہی کئی جگہ پر تلاشی بھی کی جا سکتی ہے۔ اس درمیان ایس آئی ٹی نے ہریدوار پولیس سے پلکت آریہ کا کریمنل ریکارڈ مانگا ہے۔