امریندر سنگھ نے براہ راست ادائیگی کے مسئلے پر آڑھتیوں کو یقین دہانی کروائی

چنڈی گڑھ: پنجاب کے وزیراعلیٰ کیپٹن امریندر سنگھ نے اناج کی خریداری کی ادائیگی براہ راست کسانوں کے کھاتوں میں ڈالنے کے مسئلے پر کسی طرح کی چھوٹ نہ دینے پر مرکز کے تازہ احکامات کے مد نظر آڑھتیوں کو ان کی حکومت کی جانب سے مکمل حمایت کی یقین دہانی کروائی ہے۔

ریاست کے آڑھتیوں کے ساتھ ورچول میٹنگ کے دوران وزیراعلیٰ نے آج یہاں کہا کہ ’میرے دروازے آپ کے لیے ہمیشہ کھلے ہیں۔ ریاستی حکومت ان کے ساتھ کھڑی رہے گی اور کسانوں کو آڑھتیوں کی جانب سے ادائیگی کرنے کے نظام کو تباہ کرنے لیے مرکزی حکومت کے اقدام کے خلاف لڑائی لڑے گی‘۔

انہوں نے کہا کہ پنجاب میں آڑھتیے خریداری کے نظام کا اٹوٹ حصہ بنے رہیں گے۔ وزیراعلیٰ نے متعلقہ محکمہ کو آڑھتیوں کے ریاستی حکومت کی جانب سے بقایا 131 کروڑ روپیے جاری کرنے کا حکم دیا۔ انہوں نے ڈی بی ٹی کے مسئلے پر وزیراعظم نریندر مودی سے ملنے کے لیے وقت مانگا ہے جو مختلف ریاستوں کی انتخابی مہم میں مصروف ہیں۔

کیپٹن سنگھ نے کہا کہ انہوں نے 19 مارچ کو وزیراعظم کو خط لکھا تھا۔ مرکزی وزیرداخلہ سے ذاتی طور پر بات چیت کی تھی اور مرکزی وزیر نے انھیں اس مسئلے پر مدد کی یقین دہانی کروائی تھی۔ انہوں نے بتایا کہ ریاست کے فوڈ، سول سپلائیز اور صارفین کے امور کے وزیر بھارت بھوشن آشو نے اس مسئلے پر شاہ سے ملاقات کی تھی۔

فیڈریشن آف آڑھتیہ ایسوسی ایشن آف پنجاب نے ہریانہ پر الزام عائد کیا کہ مرکزی حکومت کی ڈی بی ڈی کی تجویز کو منظور کرکے ان کے ساتھ دھوکہ کیا گیا۔ انہوں نے پڑوسی ریاست کے وزیراعلیٰ ایم ایل کھٹر اور وزیراعظم کو ایک سکے کے دو پہلو قرار دیا۔ انہوں نے کیپٹن سنگھ سے کہا کہ ہم آپ پر بھروسہ کر سکتے ہیں۔