12 ویں کے امتحان کرانے کے لئے تمام ریاستیں رضامند، دہلی نے کہا پہلے طلباء کو ٹیکہ لگے

سی بی ایس ای بورڈ کے امتحان ہونے چاہیے یا نہیں اس تعلق سے مرکز ی وزیر دفاع راج ناتھ سنگھ کی قیادت میں ایک اعلی سطحی میٹنگ ہوئی۔ اس میٹنگ میں تمام ریاستوں کے وزراء تعلیم نے کہا کہ امتحان ہونے چاہیے، جبکہ دہلی حکومت کے وزیر تعلیم منیش سسودیا نے کہا کہ پہلے امتحان دینے والے طلباء کو ٹیکہ لگے اس کے بعد امتحان ہوں۔

دہلی کے نائب وزیر اعلی اور وزیر تعلیم منیش سسودیا کا کہنا تھا کہ 12 ویں جماعت کے 95 فیصد طلباء کی عمر ساڑے سترہ سال سے زیادہ ہے اس لئے اس تعلق سے مرکز کو ماہرین سے بات کرنی چاہیے کہ انہیں ٹیکہ لگوایا جا سکتا ہے یا نہیں۔ انہوں نے کہا کہ بغیر ٹیکہ لگوائے امتحان دلوانا وبا کے اس دور میں ایک بڑی غلطی ثابت ہو سکتی ہے۔ انہوں نے یہاں تک مشورہ دیا کہ مرکز کو اس تعلق سے فائزر کمپنی سے بات کرنی چاہیے۔ انہوں نے کہا کہ بچوں کی حفاظت حکومت کی ذمہ دار ی ہے۔

عام طور پر ایسے اجلاس یا تو وزیر تعلیم کی صدارت میں بلائے جاتے ہیں یا وزیر اعظم یا وزیر داخلہ کی قیادت میں، لیکن یہ شائد پہلی مرتبہ ہے کہ وزیر دفاع کی قیادت میں تعلیم کے تعلق سے ایک اعلی سطحی اجلاس منعقد کیا گیا۔ اس اجلاس میں وزیر تعلیم رمیش پوکھریال نشنک، مرکزی وزیر اسمرتی ایرانی، پرکاش جاوڈیکر کےعلاوہ تمام ریاستوں کے وزراء تعلیم اور سکریٹری تعلیم نے شرکت کی۔

وزیر دفاع راج ناتھ سنگھ نے تمام ریاستوں سے اس تعلق سے ان کے تحریری جواب مانگے ہیں اور ان کو اس کے لئے دو دن کا وقت دیا ہے۔ انہوں نے کہا کہ تمام ریاستوں کے تحریری جواب آنے کے بعد 30 کو وہ ایک میٹنگ کریں گے جس میں آگے کا راستہ طے کیا جائے گا۔ واضح رہے کانگریس کی جنرل سیکریٹری پرینکا گاندھی وبا کے اس دور میں امتحان کروانے کے حق میں نہیں ہیں۔