ہماچل میں بارش کی تباہی، پلک جھپکتے ہی ندی میں سما گئی عمارت، 250 گھروں کو پہنچا نقصان، 9 افراد ہلاک

ہماچل پردیش میں ہو رہی موسلادھار بارش نے کہرام مچا رکھا ہے۔ ریاست میں چاروں طرف تباہی کا منظر ہے۔ دل دہلا دینے والی تصویریں اور ویڈیوز سامنے آ رہی ہیں۔ کہیں پل بہہ گئے ہیں تو کچھ علاقوں میں سیلاب جیسے حالات ہیں۔ منالی میں بیاس ندی کے کنارے بنی ایک عمارت ندی میں غرق ہو گئی۔ اس واقعہ کی جو خوفناک ویڈیو سامنے آئی ہے اسے دیکھ کر لوگوں کی روح کانپ جائے گی۔ یہ ویڈیو کچھ مقامی لوگوں نے بنائی ہے جس کی تصدیق پولیس نے بھی کی ہے۔ ویڈیو میں دیکھا جا سکتا ہے کہ عمارت پلک جھپکتے ہی منہدم ہو گئی اور پانی میں بہہ گئی۔

منڈی میں بھی حالات انتہائی خوفناک ہیں۔ زوردار بارش کے سبب شہر کے کچھ حصوں میں سیلاب کی حالت پیدا ہو گئی ہے۔ منڈی کے تھناگ میں بادل پھٹنے سے اچانک تباہی والے منظر سامنے آ گئے۔ دوسری طرف چمبا ضلع میں گزشتہ دو دنوں سے لگاتار ہو رہی بارش سے معمولات زندگی بری طرح متاثر ہے۔ راوی ندی میں طغیانی بڑھ گئی ہے اور ندی کے پاس واقع کئی گھر ڈوب گئے ہیں۔

اس درمیان ہماچل پردیش کے وزیر اعلیٰ سکھوندر سنگھ سکھو نے کہا ہے کہ ’’میں ریاستی عوام سے پھر گزارش کرتا ہوں کہ آئندہ 24 گھنٹوں تک اپنے گھروں میں رہیں، کیونکہ آنے والے 24 گھنٹوں میں زبردست بارش کا امکان ہے۔ ہم نے اس آفت سے نمٹنے کے لیے 3 ہیلپ لائن نمبر (1100، 1070 اور 1077) جاری کیے ہیں۔ کسی بھی ایمرجنسی حالت میں آپ ان نمبروں پر فون کر سکتے ہیں اور میں بھی 24 گھنٹے آپ کی خدمت کے لیے دستیاب رہوں گا۔‘‘

بلاسپور میں گمبرولا پل کے پاس لینڈ سلائڈنگ سے سڑک پر آمد و رفت متاثر ہوئی ہے۔ ہماچل پردیش کے وزیر جگت سنگھ نیگی نے کہا کہ جس طرح سے بارش ہوئی ہے اس سے بڑے پیمانے پر نقصان ہوا ہے۔ خاص کر بنیادی ڈھانچے، سڑک، پانی اور آبپاشی کی سہولیات متاثر ہوئی ہیں۔ اس کے ساتھ ہی کسانوں کے کھیتوں کے ساتھ ساتھ لوگوں کے گھروں کو بھی نقصان پہنچا ہے۔ این ڈی آر ایف، ایس ڈی آر ایف، مقامی پولیس اور انتظامیہ لوگوں کو بچانے کے لیے پوری طرح سرگرم ہیں۔ گزشتہ تین دنوں میں 9 لوگوں کی جان جا چکی ہے اور مجموعی طور پر تقریباً 250 گھروں کو نقصان پہنچا ہے۔

ہماچل پردیش کے وزیر وکرمادتیہ سنگھ نے کہا کہ بارش کے سبب ہماچل میں کافی نقصان ہوا ہے۔ ریاست میں تقریباً 765 سڑکیں متاثر ہوئی ہیں۔ انھوں نے مزید کہا کہ ’’ہم نے تقریباً 342 مشینیں ریاست کے گوشے گوشے میں تعینات کی ہیں۔ کلو-منالی میں پھنسے ہوئے لوگوں کو بھی ریسکیو کیا گیا ہے۔ الگ الگ علاقوں میں تقریباً 9 لوگوں کی موت ہوئی ہے۔‘‘

ہماچل پردیش حکومت میں وزیر روہت ٹھاکر نے کہا کہ بارش کے سبب جو نقصان ہوا ہے اس وجہ سے محکمہ تعلیم نے وزیر اعلیٰ کی جانکاری میں لاتے ہوئے فیصلہ لیا ہے کہ ہمارے اسکول اور کالج بند رہیں گے کیونکہ 10 اور 11 جولائی کے لیے ریڈ الرٹ ہے۔ ہم حالات کا جائزہ لیں گے تاکہ ہم آئندہ فیصلہ طلبا کی حفاظت کو دھیان میں رکھتے ہوئے لے سکیں۔ ہماری لوگوں سے گزارش ہے کہ اگر ضرورت نہ ہو تو گھروں سے باہر نہ نکلیں، کیونکہ 2-1 دن ایسے ہی حالات بنے رہیں گے۔