اگنی ویر اجے سنگھ کے اہل خانہ کو 98 لاکھ روپے سے زیادہ کی ایکس گریشیا رقم ملی

وزارت دفاع نے اگنی ویر اجے سنگھ کی موت کے بعد ان کے کنبہ کو کوئی امداد نہ ملنے کی خبروں کی تردید کرتے ہوئے کہا ہے کہ اب تک ان کے کنبہ کو 98 لاکھ روپے سے زیادہ کی ایکس گریشیا رقم مل چکی ہے اور باقی رقم بھی تفتیشی عمل مکمل ہونے کے بعد دی جائے گی۔

وزارت دفاع کے ذرائع نے بدھ کی رات دیر گئے کہا کہ اگنی ویر اجے سنگھ کی افسوسناک موت کے بعد ان کے اہل خانہ کو امداد کی رقم کے حوالے سے صورتحال کو واضح کرنے کی ضرورت ہے۔

ذرائع نے بتایا کہ اگنی ویر اجے سنگھ اس سال جنوری میں جموں و کشمیر کے نوشیرہ سیکٹر میں بارودی سرنگ کے دھماکے میں مارے گئے تھے۔ اب تک ان کے کنبہ کو 98 لاکھ 39000 روپے بطور ایکس گریشیا دیے جا چکے ہیں۔ انہوں نے کہا کہ ضروری تفتیشی عمل مکمل ہونے کے بعد اس کنبہ کو 67 لاکھ روپے کی اضافی رقم ادا کی جائے گی۔

قابل ذکر ہے کہ کانگریس لیڈر راہل گاندھی نے پارلیمنٹ میں اگنی ویر کو ایکس گریشیا رقم دینے کا معاملہ اٹھانے کے بعد وزیر دفاع راج ناتھ سنگھ نے کہا تھا کہ مختلف حادثات میں مرنے والے اگنی ویر کو مناسب رقم دی جاتی ہے۔