اتر پردیش کے بعد اب اتراکھنڈ میں بھی کانوڑ کے راستہ میں موجود دکانداروں کو لکھنا ہوگا مالک کا نام، حکم جاری
ہریدوار ایس ایس پی پرمیندر ڈوبال نے بتایا کہ کانوڑ کے گزرنے والے راستہ پر جو ہوٹل، ڈھابے، ریستوراں ہیں یا جو ریہڑی پٹری والے ہیں انھیں ان کے مالک کا نام لازمی طور سے لکھنا ہوگا۔
![کانوڑ یاترا / فائل تصویر](https://media.assettype.com/qaumiawaz%2F2019-07%2F724a9ca3-2b57-4d8d-9c09-9f9558cab402%2Fkawar_yatra.jpeg?rect=0%2C4%2C1000%2C563&auto=format%2Ccompress&fmt=webp)
اتر پردیش حکومت کے ذریعہ کانوڑ یاترا والے راستہ میں موجود دکانداروں کو اپنا نام لکھ کر لگانے کی ہدایت دی گئی ہے جس پر خوب تنازعہ ہو رہا ہے۔ اپوزیشن پارٹیاں، حتیٰ کہ بی جے پی کے سینئر لیڈر مختار عباس نقوی نے بھی اس طرح کے عمل کی تنقید کی ہے، لیکن یوگی حکومت پر اس کا کوئی اثر دکھائی نہیں دے رہا۔ اب خبریں سامنے آ رہی ہیں کہ اتر پردیش کی ہی طرح اتراکھنڈ کی بی جے پی حکومت نے بھی کانوڑ یاتریوں کے گزرنے والے سبھی راستوں کے دکانداروں کو اپنا نام لکھ کر لگانے کا حکم صادر کر دیا ہے۔
میڈیا رپورٹس کے مطابق اتراکھنڈ میں کانوڑ یاترا کے راستوں پر دکانداروں کو ہوٹل اور ڈھابے والوں کو ریٹ لسٹ کے ساتھ ہی اپنا نام بھی لکھنے کی ہدایت دی گئی ہے۔ ہریدوار پولیس انتظامیہ نے اس تعلق سے حکم نامہ جاری کیا ہے۔ ہریدوار ایس ایس پی پرمیندر ڈوبال کا کہنا ہے کہ کانوڑ راستہ پر جو ہوٹل، ڈھابے، ریستوراں ہیں یا جو ریہڑی پٹری والے ہیں، انھیں ان کے مالک کا نام لازمی طور سے لکھنا ہوگا۔ ایسا نہ کرنے پر ان کے خلاف قانونی کارروائی کی جائے گی۔
قابل ذکر ہے کہ گزشتہ دنوں ہریدوار میں کچھ تنظیموں نے پولیس کے سامنے مطالبہ کیا تھا کہ کانوڑیوں کے گزرنے والے راستہ پر شیو بھکتوں کو کسی طرح کی پریشانی نہ ہو، اس کے لیے دکاندار دکانوں پر اپنا نام ضرور رکھیں۔ اس گزارش کو پیش نظر رکھتے ہوئے پولیس نے یہ فیصلہ لیا ہے۔
اس درمیان ہریدوار کے منگلور علاقہ میں ڈھابہ پر لہسن اور پیاز سے تیار کھانا کپیش کیے جانے پر ہوئے ہنگامہ کے بعد پولیس نے ڈھابہ اور ہوٹل چلانے والوں کے ساتھ میٹنگ کی ہے۔ اس میں پولیس نے کہا کہ ڈھابہ اور ہوٹلوں میں کانوڑ یاترا کے دوران لہسن اور پیاز کا کھانا پیش نہیں کیا جائے گا۔ ساتھ ہی گوشت کی چیزیں کسی بھی حال میں نہیں بنائی جائیں گی۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔