جموں و کشمیر میں بادل پھٹنے کے بعد بہہ گئے لوگوں کے گھر، رہائشی علاقوں میں پانی داخل، سری نگر-لیہہ قومی شاہراہ بند

ملک میں ان دنوں کئی ریاستوں میں جگہ جگہ تیز بارش اور بادل پھٹنے کے واقعات رونما ہو رہے ہیں۔ آج جموں و کشمیر کے گاندربل ضلع میں بادل پھٹنے سے ضلع میں سڑکوں کو کافی نقصان پہنچا ہے جبکہ کئی لوگوں کے گھروں اور گاڑیوں کے بھی پانی کے تیز بہاؤ میں بہہ جانے کی اطلاع ملی ہے۔ گاندربل ضلع کے کچیروان میں سڑک میں دراریں آنے کی وجہ سے سری نگر-لیہہ قومی شاہراہ پر آمد و رفت کو اگلے حکم تک بند کر دیا گیا ہے۔

بادل پھٹنے کے بعد جموں و کشمیر کے اس علاقے میں اچانک آئے سیلاب کی وجہ سے رہائشی گھروں سمیت کچھ عمارتوں کو نقصان پہنچا۔ واضح ہو کہ مئی کے مہینے میں بھی یہاں بادل پھٹنے کے واقعہ میں سڑکوں کو کافی نقصان پہنچا تھا۔ چیروان کنگن علاقے کے لوگوں نے بتایا کہ کئی گاڑی ملبے میں پھنس گئے ہیں اور رہائشی علاقوں میں پانی داخل ہوگیا ہے جبکہ کھیتی کو بھی کافی نقصان پہنچا ہے۔ اس کے علاوہ پڈبل کے پاس نہر اوور فلو ہونے کی وجہ سے سڑک پر کیچڑ جمع ہوگیا ہے جس کی وجہ سے ایس ایس جی روڈ بند ہوگیا ہے۔ راحت کی بات ہے کہ اس سلسلے میں کسی جانی نقصان کی اطلاع نہیں ہے۔

بادل پھٹنے کے واقعہ کے بعد ضرورت مند لوگوں کو مدد فراہم کرنے کے لئے افسران موقع پر موجود ہیں۔ قومی شاہراہ بند ہوجانے کی وجہ سے وادی کشمیر کا رابطہ لداخ سے منقطع ہو گیا ہے جبکہ امرناتھ یاترا کے لیے بال ٹال بیس کیمپ کی رسائی بھی مشکل ہوگئی ہے۔ مقامی لوگوں کے مطابق کنگن، گاندربل میں بڑے پیمانے پر بادل پھٹنے سے کئی سڑکوں اور فصلوں کو بھی نقصان ہوا ہے۔ نقصان کا اندازہ لگانے اور حالات کا جائزہ لینے کے لیے ضلع انتظامیہ کے افسران موقع پر پہنچے ہوئے ہیں۔