ادھیر رنجن چودھری نے لوک سبھا اسپیکر کو لکھا خط، کہا- اسمرتی ایرانی راشٹرپتی نام کے تنازع پر غیر مشروط معافی مانگیں

لوک سبھا میں کانگریس پارٹی کے لیڈر ادھیر رنجن چودھری نے لوک سبھا اسپیکر اوم برلا کو خط لکھا ہے۔ خط میں انہوں نے مرکزی وزیر اسمرتی ایرانی سے غیر مشروط معافی مانگنے کو کہا ہے۔ خط میں ادھیر رنجن چودھری نے لکھا ہے کہ مرکزی وزیر اسمرتی ایرانی نے لوک سبھا میں صدر دروپدی مرمو کا نام لیتے وقت (مہامہم) یعنی قابل احترام الفاظ کا استعمال نہیں کیا۔ ادھیر رنجن چودھری نے کہا کہ اسمرتی ایرانی نے جمعرات کو ایوان میں بار بار 'دروپدی مرمو' لفظ کا استعمال کیا۔ مرکزی وزیر نے ان کے نام کے ساتھ (مہامہم) یعنی قابل احترام الفاظ کا استعمال نہیں کیا حالانکہ وہ اعلیٰ آئینی عہدہ پر فائز ہیں۔

خط میں ادھیر رنجن چودھری نے کہا ہے کہ صدر کے بارے میں بات کرتے ہوئے ان کی زبان پھسل گئی۔ ایسے میں ان کے منہ سے ’راشٹرپتنی‘ لفظ نکل گیا تھا۔ انہوں نے کہا کہ صدر دروپدی مرمو کا نام اس پورے تنازع میں گھسیٹا گیا ہے۔ انھوں نے کہا کہ ان سے یہ غلطی اس لیے سرزد ہوئی ہے کہ ان کی ہندی اتنی اچھی نہیں ہے۔

ادھیر رنجن چودھری نے اس سے قبل جمعہ کو لوک سبھا اسپیکر اوم برلا سے ایک اور اپیل کی تھی۔ انہوں نے کہا تھا کہ ان تمام باتوں کو لوک سبھا کی کارروائی سے ہٹا دیا جانا چاہئے، جو ’راشٹرپتنی‘ والے ان کے ریمارکس کو لے کر ایوان میں ہنگامہ کے دوران حکمراں پارٹی کی طرف سے سونیا گاندھی کے حوالے سے کی گئی ہیں۔ چودھری نے یہ بھی کہا کہ مرکزی وزیر اسمرتی ایرانی کے بیان کا وہ حصہ بھی ہٹا دیا جانا چاہئے جس میں انہوں نے صدر دروپدی مرمو کا نام لیتے ہوئے مبینہ طور پر ان کے نام کے ساتھ قابل احترام الفاظ کا استعمال نہیں کیا۔