عصمت دری کے ملزم بھگوڑے سوامی نتیانند نے بنایا 'ریزرو بینک آف کیلاسا'!

ایکواڈور کے قریب واقع ایک جزیرہ پر مبینہ طور پر 'کیلاسا' نامی ملک بسانے والے سوامی نتیا نند نے 'ریزرو بینک آف کیلاسا' بنانے کا بھی اعلان کر دیا ہے۔ عصمت دری کے ملزم اور بھگوڑے سوامی نتیانند نے اس بات کا انکشاف جاری کردہ ایک ویڈیو میں کیا ہے، اور ساتھ ہی یہ بھی بتایا ہے کہ بہت جلد وہ ایک کرنسی بھی لانچ کریں گے۔ سوامی نتیانند کا دعویٰ ہے کہ یہ سب کچھ وہ قانون کے تحت کر رہے ہیں اور بینک قائم کرنے سے لے کر کرنسی لانچنگ تک سبھی ضروری ضابطوں کو پورا کیا گیا ہے۔

ہندوستان میں بچوں کے ساتھ جنسی استحصال کے الزام کا سامنا کر رہے سوامی نتیانند نے ویڈیو میں کہا ہے کہ کرنسی کی لانچنگ وہ گنیش چترتھی کے موقع پر یعنی آئندہ 22 اگست کو کریں گے۔ انھوں نے بتایا کہ اس سے متعلق سبھی قانونی کارروائیاں مکمل کر لی گئی ہیں اور کیلاسا کے اکونومی سسٹم کو بھی تیار کر لیا گیا ہے۔

قابل ذکر ہے کہ 2019 میں کیلاسا نامی ملک بنانے والے سوامی نتیانند نے اس ملک کا ایک الگ جھنڈا بھی تیار کر لیا ہے اور اس کا الگ آئین بھی ہے۔ بتایا جاتا ہے کہ ہندوستان سے فرار ہونے کے بعد نتیانند نے کیلاسا میں ہی پناہ لی ہوئی ہے اور وہاں کا پاسپورٹ بھی تیار کر لیا ہے۔ ہندوستان میں نتیانند کے خلاف قانونی کارروائی چل رہی ہے اور ایک بھی سماعت میں اس نے حاضری نہیں دی ہے۔