’توتاری بجاتا آدمی‘ ہوگا این سی پی شردپوار کا انتخابی نشان، سپریم کورٹ نے بھی لگائی مہر

لوک سبھا انتخابات کے اعلان کے بعد جہاں تمام سیاسی پارٹیاں اپنی اپنی بساط بچھانے میں مصروف ہیں، وہیں شردپوار کی این سی پی اپنے انتخابی نشان کے لیے تشویش میں مبتلا تھی۔ مگر آج سپریم کورٹ نے شرد پوار کو بڑی راحت دیتے ہوئے انہیں ’توتاری بجاتا آدمی‘ کا انتخابی نشان استعمال کرنے کی اجازت دے دی ہے۔ یعنی الیکشن کمیشن کے بعد سپریم کورٹ نے بھی اس انتخابی نشان پر مہر لگا دی ہے۔

سپریم کورٹ نے آج اس تعلق سے ہوئی سماعت کے دوران اجیت پوار گروپ کو انتخابی مہم میں شرد پوار کے نام کا استعمال کرنے یا اپنے کسی انتخابی مواد پر ان کی تصویر شائع کرنے سے بھی روک دیا ہے۔ عدالت نے الیکشن کمیشن کو اس سے متعلق ہدایت دیتے ہوئے شردپوار گروپ کو توتاری بجاتا آدمی کا انتخابی نشان استعمال کرنے کی اجازت دینے کا حکم دیا ہے۔ اس کے ساتھ ہی عدالت نے اجیت پوار گروپ کو ایک پبلک نوٹس جاری کرنے کا بھی حکم دیا ہے کہ اس کے ’گھڑی‘ کے انتخابی نشان کا استعمال سپریم کورٹ میں زیر التواء اپیل کے فیصلے سے مشروط ہے۔ عدالت نے کہا کہ تب تک تمام اشتہارات کے ساتھ ایسا اعلان کیا جائے۔

واضح رہے کہ گزشتہ ہفتے جسٹس سوریہ کانت اور کے وی وشوناتھن کی بنچ نے انتخابی مہم کے لیے شرد پوار کے نام اور تصویروں کے مبینہ استعمال پر اجیت پوار کیمپ کی سرزنش کی تھی، جبکہ اس سے قبل سپریم کورٹ نے مہاراشٹر کے نائب وزیر اعلیٰ اجیت پوار سے کہا تھا کہ وہ ووٹ حاصل کرنے کے لیے اپنے چچا اور نیشنلسٹ کانگریس پارٹی (این سی پی) کے بانی شرد پوار کی پیٹھ پر سوار نہ ہوں۔ جسٹس سوریہ کانت اور کے وی وشوناتھن کی بنچ نے کہا تھا کہ اجیت پوار کو اپنی پارٹی کے پرچے اور نوٹس پر شرد پوار کی تصویروں اور نام کا استعمال کرنے سے بچنا چاہئے۔

جسٹس سوریہ کانت نے اجیت پوار گروپ کی جانب سے پیش ہونے والے سینئر وکیل منیندر سنگھ سے سوال کیا تھا کہ آپ ان (شرد پوار) کی تصویر کیوں استعمال کر رہے ہیں؟ اگر آپ کو اپنی مقبولیت اور بڑا لیڈر ہونے کے بارے میں اتنا ہی یقین ہے تو آپ اپنی تصویر استعمال کیجیے اور اس پر عوام سے ووٹ مانگیے۔ آپ شردپوار کی پیٹھ پر کیوں سوار ہیں؟ شرد پوار گروپ کی جانب سے پیش ہونے والے سینئر وکیل سنگھوی نے کہا کہ اگر آپ (اجیت پوار گروپ) میں ہمت ہے تو اپنے ووٹ خود حاصل کریں۔