جمعہ کو ہوئے پرتشدد واقعہ میں ملوث پریاگ راج سمیت دیگر اضلاع سے 304 مشتبہ افراد گرفتار: پرشانت کمار

لکھنؤ: اترپردیش کے مختلف شہروں میں ناموس رسالتؐ کے نام پر جمعہ کی نماز کے بعد نکالے گئے پرامن مظاہرے میں تشدد پھوٹ پڑنے کے بعد پولیس نے جمعہ سے اب تک پریاگ راج، سہارنپور، مرادآباد اور فیروزآباد سمیت نو اضلاع میں شرپسندی میں ملوث تقریباً 304 افراد کو گرفتار کیا ہے۔

ریاست کے اڈیشنل ڈائریکٹر جنرل آف پولیس (نظم ونسق) پرشانت کمار کی جانب سے دی گئی جانکاری کے مطابق ہفتہ کو پوری رات چلی گرفتاریوں کے نتیجے میں اتوار کی صبح 08 بجے تک تشدد والے شہروں سے 304 مشتبہ افراد کو حراست میں لیا گیا ہے۔ حراست سے جڑے اعداد کے مطابق کل 9 اضلاع میں درج کی گئی 13 ایف آئی آر کے تحت کی گئی کاروائیوں میں یہ گرفتاریاں ہوئی ہیں۔

اس سے جڑے اعداد کے مطابق پریاگ راج میں درج تین ایف آئی آر کے تحت 91 افراد کو گرفتارکیا گیا ہے۔ اس کے علاوہ سہارنپور میں بھی تین ایف آئی آر کے تحت 71 اور ہاتھرس میں ایک ایف آئی آر کے تحت 51 لوگ اب تک گرفتار ہوچکے ہیں۔ وہیں امبیڈکر نگر میں ایک ایف آئی آر درج ہوئی ہے اور 28 افراد کو گرفتار کیا گیا ہے۔ مرادآباد میں ایک ایف آئی آر درج کر کے 43 افراد، فیروزآباد میں ایک ایف آئی آر کے تحت 15 مشتبہ افراد کو گرفتار کیا جاچکا ہے۔ علی گرھ میں 6 اور جالون میں 2 افراد گرفتار کئے جاچکے ہیں۔ شرپسندی سے وابستہ ایک ایف آئی آر لکھیم پوری کھیری میں بھی درج کی گئی ہے حالانکہ ابھی تک کھیری میں کوئی گرفتاری نہیں ہوئی ہے۔

اس درمیان پولیس انتظامیہ نے پریاگ راج تشدد کے مبینہ ماسٹر مائنڈ کے طور پر گرفتار کئے گئے محمد جاوید عرف جاوید پمپ کو گرفتار کر کے اتوار کو خلدآباد واقع ان کے عالی شان مکان کا مین گیٹ مسمار کردیا ہے۔ پولیس کو پریاگ راج تشدد معاملے میں اہم کردار ادا کرنے والے آٹھ نشان زد ملزمین کی تلاش ہے۔