آئی پی ایل 2020: سہواگ نے کوہلی کو تیز بلے بازی کرنے کا دیا مشورہ

نئی دہلی: ہندستانی کرکٹ ٹیم کے سابق سلامی بلے باز وریندر سہواگ نے رائل چیلنجرز بنگلور کے کپتان وراٹ کوہلی کو تیز کھیلنے کا مشورہ دیا ہے۔واضح رہے کہ انڈین پریمیر لیگ کے 13 ویں سیزن میں رائل چیلنجرز بنگلور کی ٹیم نے آخری میچ کے بعد پلے آف میں جگہ بنا لی۔ ٹیم دہلی کیپٹلز کے خلاف ہار گئی، پھر بھی وہ آخری چار میں جگہ بنانے میں کامیاب رہی۔ سابق ہندستانی اوپنر وریندر سہواگ نے کہا ہے کہ بنگلور کے کپتان وراٹ کوہلی کو تیز اسکور کرنا پڑے گا۔

ایک انگریزی ویب سائٹ سے گفتگو کرتے ہوئے سہواگ نے کہا کہ کوہلی کو اپنی بیٹنگ کا طریقہ تبدیل کرنے کی ضرورت ہے۔ انہوں نے کہا کہ کوہلی کو اپنی بیٹنگ کا انداز تیز رفتار سے تبدیل کرنا پڑے گا۔ وہ کم از کم 20-25 گیندیں لیتے ہیں اور پھر تیز رنز بنانے کے موڈ میں آجاتے ہیں۔ اس کے بعد جب وہ آؤٹ ہوتے ہیں تو ان کی ٹیم پریشانی میں پڑ جاتی ہے۔

سہواگ کا مزید کہنا تھا کہ دہلی ٹیم کے خلاف بھی ایسا ہی ہوا۔ اگر وہ آؤٹ نہ ہوتے تو وہ 40 گیندوں میں کم از کم 70 یا 80 رن بناسکتے تھے۔ اگر ایسا ہوتا تو بنگلور کی ٹیم دہلی کے خلاف عمدہ اسکور کرنے میں کامیاب ہوگئی ہوتی۔ جب وہ جلدی آؤٹ ہوجاتے ہیں تو ان کا اسٹرائک ریٹ اتنا اچھا نہیں ہوتا ہے۔ یہ صرف 110 یا 120 کے آس پاس ہوتا ہے اور ٹیم مشکل میں نظر آتی ہے۔

وراٹ نے دہلی کے خلاف کھیلے گئے میچ کے بعد کہا کہ ہمیں بیٹنگ میں زیادہ سے زیادہ بہادری کا مظاہرہ کرنے کی ضرورت ہے۔ ہم بولنگ میں بالکل ٹھیک تھے۔ شاید پاور پلے ہمارے لئے بہتر ہوسکتے تھے جو ہماری طاقت بھی تھی۔ اگر ہم کچھ چیزوں کو اچھی طرح سے نافذ کرتے تو شاید میچ کا نتیجہ ہمارے حق میں آسکتا تھا۔