اشون نے خاندانی وجوہات کی بنا پر آئی پی ایل سے بریک لیا

نئی دہلی: ہندوستانی آف اسپنر روی چندرن اشون نے کووڈ- 19 وبا کے دوران اپنے خاندان کے ساتھ رہنے کا حوالہ دیتے ہوئے آئی پی ایل 2021 سے بریک لینے کے فیصلے کا اعلان کیا ہے۔ اشون نے یہ اعلان ان کی ٹیم دہلی کیپٹلز کی چنئی میں سن رائزرحیدرآباد پر جیت کے بعد کیا ہے۔ چنئی ان کا آبائی شہر ہے۔ دہلی نے اس میچ کے ساتھ اپنا آئی پی ایل کا چنئی مرحلہ ختم کیا ہے اور وہ اب اپنے اگلے میچوں کے لئے احمدآباد جائے گی۔

اشون نے اپنے ٹوئٹ میں کہا کہ وہ واپسی کی امید کرتے ہیں اگر چیزیں صحیح سمت میں جاتی ہیں۔ کسی کھلاڑی کے لئے بائیو ببل چھوڑنے کے بعد اس میں دوبارہ داخل ہونے کے لئے پروٹوکال کہتا ہے کہ اسے ہوٹل میں کوارنٹائن کی ایک مدت گزارنی ہوگی اور اس کے بعد ہی وہ بائیوببل میں پھر داخل ہوسکتا ہے۔

اشون نے اپنے ٹوئٹ میں کہا کہ وہ اس سال کے آئی پی ایل سے بریک لے رہے ہیں۔ ان کا خاندان کووڈ- 19 کے خلاف جنگ کر رہا ہے اور وہ اس مشکل وقت میں انہیں اپنا تعاون دینا چاہتے ہیں۔ انہوں نے ساتھ ہی کہا کہ وہ واپسی کرنے کی امید کرتے ہیں اگر چیزیں صحیح سمت میں جاتی نظرآتی ہیں۔ شکریہ دہلی کیپٹلز۔

اس درمیان اشون کی فرنچائزی نے اپنی ٹوئٹر پوسٹ کے ذریعہ اسپنر کو اپنا تعاون دیا ہے۔ دہلی کیپٹلز نے کہا کہ ’’اس مشکل وقت میں ہم آپ کو اپنا مکمل تعاون دیتے ہیں ہم آپ کو اور آپ کے خاندان کو دہلی کیپٹلز میں تمام کی جانب سے اپنی طاقت اور دعائیں بھیجتے ہیں۔ اشون لیگ کے پہلے ایسے ہندوستانی بنے ہیں جو اپنے خاندان میں کووڈ- 19 کی صورت حال کے سبب لیگ سے ہٹے ہیں۔