سوال پوچھنے پر وزیر اعظم ہوئے ناراض، صحافیوں پر چھڑکنے لگے سینیٹائزر

تھائی لینڈ کے وزیر اعظم پریوت چان اوچا کا ایک ویڈیو سوشل میڈیا پر تیزی کے ساتھ وائرل ہو رہا ہے جس میں اوچا صحافیوں پر سینیٹائزر چھڑکتے ہوئے نظر آ رہے ہیں۔ رپورٹس کے مطابق پریوت چان اوچا ہفتہ وار پریس کانفرنس کو خطاب کر رہے تھے۔ اسی دوران ایک سوال پر وہ ناراض ہو گئے اور ڈائس چھوڑ کر ہٹ گئے۔ اس کے بعد سینیٹائزر کی بوتل ہاتھ میں لے کر صحافیوں پر چھڑکنے لگے۔

میڈیا ذرائع سے موصول ہو رہی خبروں کے مطابق پریس کانفرنس میں وزیر اعظم پریوت چان اوچا سے ان کی کابینہ میں ممکنہ تبدیلی کو لے کر سوال کیا گیا۔ اس سوال سے وہ خفا ہو گئے اور صحافیوں کو اپنے کام سے کام رکھنے کی صلاح دینے لگے۔ اوچا یہیں پر نہیں رکے، وہ سینیٹائزر کی بوتل اٹھا کر صحافیوں پر چھڑکنے لگے۔ یہاں قابل ذکر ہے کہ اوچا اپنی تنک مزاجی اور تلخ برتاؤ کے لیے مشہور ہیں۔

سابق فوجی کمانڈر اوچا سال 2014 میں منتخب حکومت کا تختہ پلٹ کرنے کے بعد اقتدار میں آئے تھے۔ اوچا پہلے بھی اس طرح کا رویہ اختیار کر چکے ہیں۔ ایسا ہی ایک واقعہ تب ہوا تھا جب صحافیوں سے بات چیت کے دوران ایک سوال پر اوچا ناراض ہو گئے تھے۔ انھوں نے کیمرہ مین پر کیلے کا چھلکا پھینک دیا تھا۔ اس سے قبل 2018 میں بھی اسی طرح کے پروگرام کے بعد اوچا صحافیوں سے ناراض ہو گئے تھے اور میڈیا سے بات چیت کرنے سے انکار کر دیا تھا۔ اس وقت انھوں نے خود میڈیا سے بات چیت کرنے کی جگہ اپنا آدم قد کٹ آؤٹ لگا دیا تھا اور صحافیوں سے کہا تھا کہ آپ لوگ اس کٹ آؤٹ سے ہی سوال پوچھ لیجیے۔