روس نے کیا برطانوی شہریوں کو ویزا دینے سے انکار

ماسکو: روس نے ملک مخالف سرگرمیوں میں ملوث برطانوی شہریوں کو ویزا دینے سے انکار کر دیا ہے۔ تفصیلات کے مطابق روسی وزارت خارجہ کے انفارمیشن اینڈ پریس ڈیپارٹمنٹ کے ڈپٹی ڈائریکٹر نکولائی لاکونن نے کہا ہے کہ روس ملک مخالف سرگرمیوں میں ملوث برطانوی شہریوں کے خلاف ذاتی پابندیاں عائد کر رہا ہے۔

روسی وزارت خارجہ کے مطابق ناپسندیدہ سرگرمیوں میں ملوث برطانوی شہریوں پر روس میں داخلے پر پابندی لگائی جا رہی ہے۔ نکولائی لاکونن نے کہا ہے کہ برطانوی حکام کے غیر دوستانہ اقدامات کے جواب میں اور باہمی تعاون کے اصول کی بنیاد پر روس نے برطانوی شہریوں کی متناسب تعداد کے خلاف ذاتی پابندیاں عائد کرنے کا فیصلہ کیا ہے، جو روس مخالف سرگرمیوں میں فعال طور پر ملوث ہیں۔

اپنے بیان میں انھوں نے مزید کہا کہ ایسے تمام برطانوی شہریوں کو روسی فیڈریشن میں داخلے سے منع کیا گیا ہے، روسی عہدیدار کے مطابق اس سے قبل ماسکو نے برطانوی حکام سے مطالبہ کیا تھا کہ روس مخالف اور تصادم کی پالیسی کو ختم کریں۔ روس کی جانب سے برطانیہ کو انتباہ جاری کیا گیا تھا کہ کسی بھی غیر دوستانہ اقدامات پر روس اپنا ردعمل دے گا۔