وزیر اعظم مودی دو روزہ دورے پر مصر پہنچے، ہم منصب مصطفیٰ میڈبولی نے گلے لگا کر کیا استقبال

ہندوستانی وزیر اعظم نریندر مودی امریکہ دورہ ختم کرنے کے بعد اب مصر پہنچ گئے ہیں۔ مصر کے وزیر اعظم مصطفیٰ میڈبولی اپنے ہندوستانی ہم منصب نریندر مودی کے استقبال کے لیے خود ایئرپورٹ پر پہنچے اور گلے لگا کر ان کا استقبال کیا۔ وزیر اعظم مودی کو مصر پہنچنے پر گارڈ آف آنر بھی پیش کیا گیا۔

قابل ذکر ہے کہ گزشتہ 26 سالوں میں یہ کسی ہندوستانی وزیر اعظم کا پہلا دورۂ مصر ہے۔ ہندوستان اور مصر نے اس سال اپنے سفارتی رشتوں کے 75 سال مکمل کیے ہیں اور اس کا جشن بھی منایا ہے۔ بہرحال، وزیر اعظم کا دورۂ مصر کئی معنوں میں اہمیت کا حامل ہے۔ یہ دورہ ہندوستان کے دفاعی شعبہ کے لیے بھی بے حد اہم تصور کیا جا رہا ہے۔

دراصل امریکہ کے ساتھ ہندوستان ڈیفنس ٹیکنالوجی میں شراکت داری کرنے کی کوشش کر رہا ہے۔ ساتھ ہی ساتھ وہ ایسے مارکیٹ کی تلاش کر رہا ہے جہاں اپنے دفاعی سامان کو فروخت کر سکے۔ ہندوستان کا مقصد ہے کہ وہ اپنے دفاعی کاروبار کو زیادہ سے زیادہ مضبوط کر سکے۔ اس دورہ میں ہندوستان-مصر بحری تعاون کو فروغ دینے پر بھی صلاح و مشورہ ہو سکتا ہے۔

قابل ذکر بات یہ ہے کہ مصر نے ہندوستان سے برہموس میزائل خریدنے میں بھی دلچسپی دکھائی ہے۔ مصر چاہتا ہے کہ وہ ہندوستان سے ان میزائلوں کو خریدے۔ ہندوستان بھی اپنی دفاعی مصنوعات کے ایکسپورٹ کے لیے مصر کی طرف دیکھ رہا ہے، کیونکہ مصر اپنے فوجی ہارڈویئر کی لگاتار توسیع اور ٹرانسفارمیشن پر غور کر رہا ہے۔ مصر نے ہندوستان سے تیجس لائٹ ایئرکرافٹ خریدنے میں بھی دلچسپی دکھائی ہے۔ اس کے علاوہ ایچ اے ایل کے ذریعہ ہندوستان میں تیار سکھوئی-30 ایم کے آئی اور اس کے پرزوں کو بھی ہندوستان میں تیار کرنے کی مہارت ہے، جسے مصر کو دکھایا جا سکتا ہے۔

واضح رہے کہ رواں سال پہلی بار مصر کے صدر عبدالفتح السیسی یومِ جمہوریہ پر بطور مہمانِ خصوصی ہندوستان آئے تھے۔ مصر کی فوج کی ایک ٹکڑی نے بھی یومِ جمہوریہ پریڈ میں حصہ لیا تھا۔ ہندوستانی فوج نے حال ہی میں مصر کی فوج کے ساتھ ’ایکسرسائز سائیکلون-1‘ کی پہلی جوائنٹ پریکٹس بھی کی تھی۔ گزشتہ سال ہی وزیر دفاع راجناتھ سنگھ نے بھی مصر کا سفر کیا تھا جس میں دونوں فریقین نے مختلف بحری علاقوں میں اپنے دو فریقی تعلقات کو بڑھانے کا مطالبہ کیا تھا۔