کورونا کا قہر: فرانس میں مہلوکین کی تعداد 26 ہزار کے پار، روس کا شہر ماسکو بنا ہاٹ اسپاٹ

فرانس میں گزشتہ 24 گھنٹوں کے دوران مہلک کورونا وائرس ’كووڈ 19‘ کے قہر سےمزید 243 افراد ہلاک ہوگئے جس کے بعد ملک میں اس وائرس سے ہلاک ہونے والوں کی تعداد بڑھ کر 26200 ہو گئی۔ ہیلتھ ڈائریکٹوریٹ کی جانب سے جمعہ کو جاری سرکاری اعداد و شمار میں یہ معلومات فراہم کی گئی۔

ڈائریکٹوریٹ کے مطابق ملک میں کورونا وائرس کے قہر کی وجہ سے یکم مارچ سے اب تک 26230 افراد ہلاک ہوئے ہیں۔ سرکاری اعداد و شمار کے مطابق 16497 کورونا متاثرین کی ہلاکت اسپتال میں جبکہ 9733 افراد کی ہلاکت نرسنگ ہومز میں ہوئی ہے۔ ملک میں اس وقت 22700 مریض اسپتال میں داخل ہے جن میں سے تقریبا 2868 افراد انتہائی نگہداشت یونٹ میں داخل ہیں جن کی تعداد جمعرات کو 2961 تھی۔ فرانس نے کورونا کے خطرے کی وجہ سے 17 مارچ کو ہی لاک ڈاؤن کا اعلان کر دیا تھا جس کے بعد اب آہستہ آہستہ پابندیوں میں نرمی کرنا شروع کر دی ہے۔

دوسری طرف روس کے دارالحکومت ماسکو میں گزشتہ 24 گھنٹوں کے دوران عالمی وبا کورونا وائرس ’كووڈ 19‘ کے قہر سے 54 افراد ہلاک ہو گئے جس کے بعد صرف ماسکو میں ہلاک شدگان کی تعداد بڑھ کر 1010 ہو گئی۔ ماسکو کورونا وائرس کے پھیلاؤ کا مرکز جیسا بن گیا ہے۔ رسپانس سینٹر نے ایک بیان جاری کر کے کہا ’ماسكو میں نمونيا اور دیگر بیماریوں سمیت کورونا میں مبتلا مزید 54 افراد ہلاک ہو گئے ہیں‘۔ سینٹر نے بتایا کہ یہ گزشتہ نو دنوں میں سب سے زیادہ یومیہ ہلاکتوں کی تعداد ہے۔