یوکرین کا ساتھ دینے والے جرمنی کو روسی صدر پوتن نے دیا جھٹکا، سینکڑوں جرمن ملازم کو روس چھوڑنے کا حکم

روس اور یوکرین کے درمیان جاری جنگ کے منفی اثرات دیگر ممالک پر بھی اب کھل کر سامنے آنے لگے ہیں۔ تازہ اثر جرمنی پر پڑا ہے جس کے خلاف روسی صدر پوتن نے ایک سخت فیصلہ لیا ہے۔ دراصل ولادمیر پوتن کی قیادت والی روسی حکومت نے جرمن سرکاری ملازمین کو روس چھوڑ کر واپس جرمنی چلے جانے کی ہدایت دی ہے۔

قابل ذکر ہے کہ پوتن حکومت نے یہ فیصلہ ایسے وقت میں لیا ہے جب جرمنی سمیت کئی یوروپی ممالک یوکرین کا ساتھ دے رہے ہیں اور روس کے خلاف کاروباری پابندیاں لگائی جا رہی ہیں۔ روسی حکومت کے ذریعہ جرمنی سے تعلق رکھنے والے سرکاری ملازمین کو روس چھوڑنے کی ہدایت دینے کو اسی سے جوڑ کر دیکھا جا رہا ہے۔

جرمن حکومت سے جڑے ذرائع کا حوالہ دیتے ہوئے کچھ رپورٹس سامنے آئی ہیں جس میں کہا گیا ہے کہ روس میں کام کرنے والے سینکڑوں جرمن سرکاری ملازمین کو روس چھوڑنے کے لیے مجبور کیا جا رہا ہے۔ خبر رساں ایجنسی اے ایف پی نے ہفتہ کے روز جرمن افسران کے حوالے سے یہ جانکاری دی۔ بتایا جا رہا ہے کہ روس کے اس فیصلے کے سبب تعلیمی اور ثقافتی شعبوں میں کام کر رہے سینکڑوں جرمن سرکاری ملازمین کو روس چھوڑنا پڑے گا۔

میڈیا رپورٹس کے مطابق جرمنی کو اب اپنے سفارتی ملازمین کو کم کرنے ہوں گے اور ماسکو میں گوئتھے انسٹی ٹیوٹ کلچرل آرگنائزیشن اور جرمن اسکولوں جیسے پبلک اداروں سے جرمن ملازمین کو ہٹانا ہوگا۔ روسی افسران کے ذریعہ اس کے لیے جون کے اوائل تک کا وقت دیا گیا ہے۔