ایف بی آئی نے ٹرمپ کے گھر سے غیر ملکی جوہری سلامتی کے دستاویزات برآمد کئے: رپورٹ

واشنگٹن: امریکی وفاقی تحقیقاتی ایجنسی (ایف بی آئی) نے سابق صدر ڈونالڈ ٹرمپ کی مار-اے-لاگو رہائش گاہ کی تلاشی کے دوران ایک غیر ملکی حکومت کی جوہری صلاحیتوں سے متعلق ایک دستاویز برآمد کیا ہے۔ واشنگٹن پوسٹ نے منگل کے روز نامعلوم ذرائع کا حوالہ دیتے ہوئے رپورٹ کیا کہ ایف بی آئی کو ایک دستاویز ملا ہے جس میں ایک غیر ملکی حکومت کی فوجی سلامتی کی تفصیل ہے، لیکن نامزد غیر ملکی حکومت کی شناخت ظاہر نہیں کی گئی۔

رپورٹ میں کہا گیا ہے کہ ڈونالڈ ٹرمپ کی فلوریڈا کی رہائش گاہ سے گزشتہ ماہ برآمد ہونے والے 11 ہزار سے زیادہ سرکاری دستاویزات اور تصاویر کے مواد کو ظاہر نہیں کیا گیا ہے، لیکن اس بات کا اشارہ دیا گیا ہے کہ وفاقی حکام جوہری ہتھیاروں کے بارے میں خفیہ دستاویزات تلاش کر رہے ہیں۔

اخبار نے بتایا کہ ڈونالڈ ٹرمپ کی فلوریڈا کی رہائش گاہ سے ضبط کیے گئے کچھ ریکارڈز کی عام طور پر سخت حفاظت کی جاتی ہے اور دستاویزات کے مقام کی نگرانی کے لیے ’ایک نامزد کنٹرولنگ افسر‘ ہوتا ہے۔ انہوں نے کہا کہ ایف بی آئی کی جانب سے برآمد کیے گئے ریکارڈ میں خفیہ امریکی کارروائیوں کی تفصیلات موجود تھیں۔

رپورٹ میں کہا گیا ہے کہ وائٹ ہاؤس سے انتہائی حساس سرکاری ریکارڈز کو غیر مجاز طور پر ہٹانے اور انہیں مار-اے-لاگو میں مبینہ طور پر غلط طریقے سے اکٹھا کرنے کے لیے محکمہ انصاف کی جانب سے ڈونالڈ ٹرمپ سے تفتیش کی جا رہی ہے۔