عید الفطر: کسی ملک میں اجتماعات پر پابندی تو کہیں کرفیو نافذ، دیکھیں تفصیل

کورونا وائرس انفیکشن نے اس مرتبہ رمضان کو تو پھیکا کر ہی دیا، عیدالفطر کی رونقیں بھی کم ہی ممالک میں دیکھنے کو ملیں گی۔ ہندوستان میں مختلف مسلم اداروں و تنظیموں نے پہلے ہی عیدالفطر گھر میں رہ کر ہی منانے کی گزارش مسلم طبقہ سے کی ہے، سعودی عرب، شام، مصر اور الجزائر جیسے ممالک میں بھی عیدالفطر کے اجتماعات پر پابندی عائد کر دی گئی ہے۔ کچھ ممالک تو ایسے بھی ہیں جہاں عیدالفطر کے موقع پر کرفیو کے نفاذ کا ہی اعلان کر دیا گیا ہے۔

میڈیا ذرائع سے موصول ہو رہی خبروں کے مطابق سعودی عرب، الجزائر اور مصر میں نمازِ عید کے اجتماعات پر پوری طرح سے پابندی عائد کرنے کا اعلان کر دیا گیا ہے، جب کہ شام کی حکومت نے بھی ملک میں عید الفطر کے اجتماعات پر پابندی عائد کرتے ہوئے کہا ہے کہ کورونا وبا کو پھیلنے سے روکنے کے لیے اس طرح کے اقدامات ضروری ہیں۔ شامی وزارتِ مذہبی امور کی جانب سے شامی عوام کو ہدایت کی گئی ہے کہ گھر کے افراد کے ساتھ گھر پر ہی نماز عید ادا کریں۔

دوسری طرف ترکی کے صدر رجب طیب اردگان نے ملک بھر میں عید پر کرفیو نافذ کرنے کا اعلان کیا ہے۔ کابینہ اجلاس کے بعد قوم سے خطاب کرتے ہوئے ترک صدر رجب طیب اردگان نے کہا کہ عید پر لاک ڈاؤن ہفتے سے منگل تک جاری رہے گا۔ انہوں نے مزید کہا کہ کورونا وائرس کی وباء کی روک تھام کے لیے استنبول، انقرہ اور کئی شہروں میں کر فیو نافذ کیا جا رہا ہے۔ واضح رہے کہ ترک صدر کے سابقہ احکامات کے تحت مساجد 29 مئی سے کھولی جائیں گی، جبکہ ترکی میں اسکولوں میں پڑھائی ستمبر ماہ سے شروع ہو گی۔

(یو این آئی ان پٹ کے ساتھ)