افغانستان: سرکاری ملازمین کو لے جانے والی بس دھماکے کا شکار، 7 افراد کی موت

مزار شریف: افغانستان کے شمالی صوبہ بلخ کی راجدھانی مزار شریف میں منگل کی صبح سرکاری ملازمین کو لے جانے والی ایک بس میں دھماکے میں سات افراد ہلاک اور چھ دیگر زخمی ہو گئے۔ صوبائی محکمہ پولیس کے ترجمان محمد آصف وزیری نے یہ اطلاع دی۔ مزار شریف پولیس کے اہلکار آصف وزیری نے بتایا کہ ’’یہ بم سڑک کے کنارے ایک ریڑھی میں نصب کیا گیا تھا۔ جب پٹرولیم کمپنی کی بس وہاں پہنچی تو بم پھٹ گیا۔‘‘

افسر نے نامہ نگاروں کو بتایا کہ دھماکہ صبح تقریباً 7.30 بجے اس وقت ہوا جب مزار شریف شہر کے پولیس ڈسٹرکٹ-3 کے ہراتن سرحدی شہر کے پٹرولیم ڈائریکٹوریٹ کے ملازمین کو لے کر ایک بس اپنے دفتر جا رہی تھی۔ انہوں نے کہا کہ واقعہ کی تحقیقات شروع کر دی گئی ہیں۔

خیال رہے کہ طالبان نے گزشتہ برس اگست میں ملک کا کنٹرول سنبھالنے کے بعد دعویٰ کیا تھا کہ امن و امان کی صورت حال بہتر کی گئی ہے تاہم اس عرصے میں افغانستان کے مختلف علاقوں میں متعدد بم دھماکے اور حملے ہو چکے ہیں۔ ان میں سے بیش تر حملوں کی ذمہ داری دہشت گرد تنظیم ’داعش‘ کی مقامی شاخ نے قبول کی۔

رواں ماہ کے اوائل میں مزار شریف کے جنوب مغربی علاقے میں واقع ایک مدرسے میں بھی دھماکہ ہوا تھا جس میں 19 افراد ہلاک جبکہ 24 زخمی ہو گئے تھے۔ ابھی تک واقعے سے متعلق مزید تفصیلات سامنے نہیں آئیں اور نہ ہی کسی گروپ نے اس حملے کی ذمہ داری قبول کی ہے۔