ایشیا کپ کی میزبانی سے ہندوستانی خاتون فٹ بال ٹیم پرجوش

نئی دہلی:اے ایف سی خاتون فٹ بال ایشیا کپ 2022 کے ہندوستان میں کھیلے جانے سے ہندوستانی خاتون ٹیم بہت پر جوش ہے اور ٹیم کو یقین ہے کہ اس سے ملک میں کھیلوں کا خصوصاً خواتین فٹ بال کو ایک بہت بڑا فروغ ملے گا۔ 1979 کے بعد ہندوستان پہلی بار اے ایف سی خاتون ایشیا کپ 2022 فائنلز جیسے بڑے ٹورنامنٹ کی میزبانی کرے گا۔ کنفیڈریشن آف ایشین فٹ بال (اے ایف سی) نے 2022 خاتون ایشیاء کپ آل انڈیا فٹ بال فیڈریشن (اے آئی ایف ایف) کے حوالے کیا ہے۔ یہ فیصلہ اے ایف سی خاتون فٹ بال کمیٹی نے لیا۔ ہندوستان 17 فروری سے 7 مارچ 2021 تک فیفا انڈر 17 خاتون ورلڈ کپ کی میزبانی بھی کرے گا۔

ٹیم کی ہیڈ کوچ میمول راکی کا کہنا ہے کہ وہ اس بارے میں بہت پرجوش ہیں اور انہیں یقین ہے کہ ٹیم ٹورنامنٹ میں عمدہ کارکردگی کا مظاہرہ کرے گی۔ راکی نے کہا کہ میں ہندوستان کو اس ٹورنامنٹ کی میزبانی کرتے ہوئے دیکھ کر بہت خوش ہوں۔ میں اس کی میزبانی کے لئے آل انڈیا فٹ بال فیڈریشن (اے آئی ایف ایف) کا شکریہ ادا کرتی ہوں۔ ہمارے پاس اس کی تیاری کے لئے ایک سال سے زیادہ کا وقت ہے اور مجھے یقین ہے کہ ٹیم اس ٹورنامنٹ میں بہتر کارکردگی کا مظاہرہ کرے گی۔

راکی نے کہا کہ ہندوستان میں خواتین کے فٹ بال میں ہونے والی پیشرفت کے بارے میں لوگ زیادہ سے زیادہ واقف ہو رہے ہیں۔ خواتین کھلاڑیوں کو ایشیا میں دنیا کی ٹاپ ٹیموں کے خلاف کھیلنے کا موقع ملے گا۔ شائقین جاپان، آسٹریلیا، کوریا اور چین جیسی ٹیموں کے خلاف براہ راست اسٹیڈیم میں ٹیم کو کھیلتے ہوئے دیکھیں گے۔ عالمی درجہ بندی میں 55 ویں نمبر پر آنے والی ہندوستانی خواتین کی ٹیم نے گذشتہ سال نیپال میں منعقدہ ساؤتھ ایشین گیمز میں طلائی تمغہ جیتا تھا۔ اے ایف سی ویمن پلیئر آف دی ایئر 2019 کے لئے نامزد تین کھلاڑیوں میں شامل ٹیم کی کپتان اشلتا دیوی کا کہنا ہے کہ ایشیا کپ میں کھیلنا ان کے لئے ایک خواب کی طرح ہے۔

اشالتا نے کہا کہ میں ہندوستان میں اس ٹورنامنٹ کے لئے کوششیں کرنے پر اے آئی ایف ایف اور مہیلا سمیتی کا شکریہ ادا کرتی ہوں۔ یہ ایک بڑا قدم ہے اور سب کی نگاہیں اس پر مرکوز ہیں۔ انہوں نے کہا کہ جب سے میں نے فٹ بال کھیلنا شروع کیا ہے، میں نے اپنی والدہ کے سامنے ایک بھی میچ نہیں کھیلا۔ میں صحیح وقت کا انتظار کر رہی تھی اور اب 2022 میں میں چاہتی ہوں کہ میری والدہ اسٹیڈیم آئیں اور مجھے ایشیا کی بہترین ٹیموں کے خلاف کھیلتے ہوئے دیکھیں۔

گول کیپر ادیتی چوہان نے بھی اسے ایک بہت بڑا موقع قرار دیا اور کہا کہ یہ بھی ایک بڑی ذمہ داری ہے۔ انہوں نے کہا کہ ہمارے لئے یہ ایک بہت اچھا موقع ہے کہ وہ اپنے مداحوں کو یہ ظاہر کریں کہ وہ ہم پر کیوں اعتماد کرتے ہیں جب ہم کہتے ہیں کہ ہندوستانی خواتین کی ٹیم ٹاپ ٹیموں کے خلاف بہتر کارکردگی کا مظاہرہ کرسکتی ہے۔ ادیتی نے کہا کہ اب ہمارے سامنے ایک بڑا چیلنج یہ ہے کہ ہم اس اعتماد کو برقرار رکھیں جو ہمارے پرستاروں نے ہم پر قائم کیا ہے۔