خواتین ورلڈ کپ: روایتی حریف پاکستان کے خلاف اپنی مہم کا آغاز کرے گا ہندوستان

دبئی: ہندوستان خواتین ورلڈ کپ ٹورنامنٹ میں اپنی مہم کا آغاز پاکستان کے خلاف میچ سے کرے گا۔ گزشتہ ایڈیشن کی طرح یہ ٹورنامنٹ بھی لیگ فارمیٹ میں کھیلا جائے گا۔ انٹرنیشنل کرکٹ کونسل (آئی سی سی) نے تصدیق کرتے ہوئے بتایا کہ آٹھ ٹیموں پر مشتمل یہ ٹورنامنٹ 31 دن تک جاری رہے گا جس میں کل 31 میچ کھیلے جائیں گے۔ آکلینڈ، کرائسٹ چرچ، ڈونیڈن، ہیملٹن، تورنگا اور ویلنگٹن ان میچوں کی میزبانی کریں گے۔

چارمارچ کو میزبان نیوزی لینڈ اور ویسٹ انڈیز کے درمیان میچ کے ساتھ خواتین ون ڈے ورلڈ کپ کا آغاز ہو گا۔ یہ میچ تورنگا میں کھیلا جائے گا۔ اس کے اگلے روز ہیملٹن میں چھ بار کی عالمی چیمپئن آسٹریلیا کا مقابلہ دفاعی چیمپئن انگلینڈ سے ہوگا، پھر پچھلی بار کی رنر اپ ہندوستانی ٹیم کا اپنے پرانے حریف پاکستان سے سامنا ہو گا۔ پہلے کی طرح یہ ٹورنامنٹ بھی لیگ فارمیٹ میں کھیلا جائے گا جہاں ہر ٹیم دوسری ٹیموں سے ایک بار کھیلے گی۔

ٹاپ چار ٹیمیں سیمی فائنل کے لیے کوالیفائی کریں گی۔ 30 مارچ کو ویلنگٹن اور 31 مارچ کو کرائسٹ چرچ میں سیمی فائنل مقابلے کھیلے جائیں گے۔ دونوں سیمی فائنل اور فائنل دونوں میچوں کے لیے ریزرو ڈے بھی ہوگا۔ آسٹریلیا، انگلینڈ، ہندوستان اور جنوبی افریقہ نے آئی سی سی ویمنز چیمپئن شپ 2017-20 کے پوائنٹس ٹیبل میں اپنی جگہوں کی بنیاد پر ٹورنامنٹ کے لیے جگہ بنائی ہے۔ وہیں نیوزی لینڈ کو میزبان ملک ہونے کی وجہ سے اس مقابلے میں جگہ ملی ہے۔