ہندوستانی خاتون ٹیم ستمبر میں کرے گی آسٹریلیا کا دورہ

نئی دہلی: ہندوستانی خواتین کرکٹ ٹیم رواں سال ستمبر ماہ میں آسٹریلیا میں ایک سیریز کھیلے گی۔ تین روزہ یہ دورہ اصل میں رواں سال جنوری میں ہونا تھا لیکن دسمبر 2020 میں ملتوی کردیا گیا تھا۔ کرکٹ آسٹریلیا کی ویب سائٹ پر اس وقت کہا گیا تھا کہ اسے 2021-22 سیزن میں دوبارہ مقرر کیا جائے گا اور اس میں تین ٹی 20 شامل کیے جاسکتے ہیں۔

کرکٹ آسٹریلیا نے تاریخوں یا سیریز کی صورت حال کے تعلق سے ابھی تک باضابطہ اعلان نہیں کیا ہے لیکن آسٹریلیائی فاسٹ بالر میگن شٹ نے حال ہی میں ایک پوڈ کاسٹ میں کہا تھا کہ ان کی ٹیم کی اگلی سیریز ہندوستان کے خلاف ہوسکتی ہے۔ سمجھاجاتا ہے کہ آسٹریلیائی بورڈ جلد ہی سیریز کے لئے نئی تاریخوں کا اعلان کرے گا۔

ہندوستان کو اگلے ماہ انگلینڈ کے دورے پرجانا ہے جو 16 جون سے شروع ہوگا۔ اس ٹور میں ہندوستان کو برسٹل میں ایک ٹیسٹ، تین ون ڈے اور تین ٹی ٹونٹی کھیلنا ہے۔ کم از کم پانچ ہندوستانی کھلاڑی ہرمن پریت کور، اسمرتی مندھانا، جیمما روڈرگز، دیپتی شرما اور شیفالی ورما کے 21 جولائی سے 21 اگست تک ہونے والے دی ہنڈریڈ کے پہلے ایڈیشن میں حصہ لینے کی امید ہے۔ ورما اور رادھا یادو سمیت کئی ہندوستانی کھلاڑیوں کے اکتوبر-نومبر میں ہونے والی ویمن بگ بیش لیگ کے ساتویں ایڈیشن میں حصہ لینے کا امکان ہے۔