پاکستانی بلے باز سرفراز احمد کے سر پر لگی تیز گیندباز فرنانڈو کی گیند، 5 اوور بعد آیا چکّر تو ہوئے ریٹائرڈ ہرٹ

کرکٹ اس وقت دنیا کے مقبول ترین کھیلوں میں شمار ہو رہا ہے اور دن بہ دن اس کے تئیں لوگوں کی دلچسپی بڑھتی جا رہی ہے۔ حالانکہ میدان پر کئی بار ایسے حادثات پیش آتے ہیں جو کھلاڑیوں میں ایک خوف پیدا کر دیتے ہیں۔ کچھ ایسا ہی پاکستان اور سری لنکا کے درمیان کھیلے جا رہے میچ کے دوران دیکھنے کو ملا۔ کولمبو میں کھیلے جا رہے دوسرے ٹیسٹ کے دوران پاکستان کے وکٹ کیپر بلے باز سرفراز احمد کے ہیلمٹ پر آج سری لنکائی تیز گیندباز اسیتھا فرنانڈو کی گیند لگی۔ یہ 81واں اوور تھا، لیکن فیزیو کی رسمی جانچ کے بعد کھیل دوبارہ شروع ہو گیا۔ لیکن 86ویں اوور میں اچانک سرفراز احمد کو چکّر کا احساس ہوا اور فیزیو کو ایک بار پھر میدان پر آنا پڑا۔

بتایا جاتا ہے کہ 86واں اوور ختم ہونے کے بعد سرفراز احمد نے چکر کی شکایت کی جس کے بعد فیزیو میدان پر پہنچے۔ کچھ دیر تک انھوں نے سرفراز کو میدان پر ہی دیکھا اور کچھ بات چیت کی۔ اس دوران فیزیو نے محسوس کیا کہ معاملہ اتنا معمولی نہیں ہے جتنا کہ دیکھنے میں لگ رہا ہے۔ یعنی سرفراز کو تفصیلی جانچ کرانی ہوگی۔ حالات کی نزاکت کو دیکھتے ہوئے فیزیو سرفراز کو لے کر میدان سے باہر چلے گئے۔ یعنی سرفراز احمد ریٹائرڈ ہرٹ ہو گئے۔ اس وقت وہ 22 گیندوں پر 14 رن بنا کر کھیل رہے تھے۔

قابل ذکر ہے کہ اسیتھا فرنانڈو کی جس گیند پر سرفراز کے سر میں چوٹ لگی تھی، وہ ہیلمٹ میں ٹکرا کر باؤنڈری پار چلی گئی تھی۔ یعنی لیگ بائی کے 4 رن پاکستان کو حاصل ہوئے تھے۔ اس کے بعد تقریباً 5 اوور تک تو سرفراز میدان پر کھڑے رہے، لیکن اس کے بعد ان کے رویہ سے ایسا لگا جیسے کہ ان کی آنکھوں کے سامنے تاریکی پھیل رہی ہے۔ ہیلمٹ پر گیند لگنے سے سرفراز کو چوٹ ان کے سر کے پچھلے حصے میں لگی ہے۔ علاج کے لیے وہ میدان سے باہر جا چکے ہیں اور امید کی جا رہی ہے کہ معاملہ زیادہ سنگین نہ ہو اور سب ٹھیک ہو۔ اگر معاملہ زیادہ سنگین نہیں رہا تو سرفراز دوبارہ بلے بازی کے لیے اتر سکتے ہیں اور اپنی بلے بازی وہیں سے شروع کر سکتے ہیں جہاں پر وہ اسے چھوڑ کر گئے ہیں۔