ٹی-20 ورلڈ کپ: سری لنکا اور نیپال کا میچ بارش کی نذر، جنوبی افریقہ سپر 8 میں پہنچنے والی پہلی ٹیم

ٹی 20 ورلڈ کپ کا 23واں میچ سری لنکا اور نیپال کے درمیان کھیلا جانا تھا تاہم میچ ٹاس ہوئے بغیر ہی بارش کی نذر ہو گیا۔ یہ مقابلہ فلوریڈا کے سینٹرل بروورڈ ریجنل پارک اسٹیڈیم ٹرف گراؤنڈ میں کھیلا جانا تھا۔ بارش کے بعد منسوخ ہونے والے میچ میں دونوں ٹیموں کو ایک ایک پوائنٹ مل گیا ہے۔ اس طرح جنوبی افریقہ وہ پہلی ٹیم بن گئی جس نے سپر 8 میں رسائی حاصل کر لی ہے۔

واضح رہے کہ سری لنکا آج کا میچ جیت جاتا تو وہ پاکستان کی طرح اگر مگر کی صورتحال سے دوچار ہوتا اور میچ ہارتا تو اس کا ورلڈ کپ کا سفر اسی راؤنڈ میں اختتام پذیر ہو جاتا۔ ایونٹ میں سری لنکا کو جنوبی افریقہ اور بنگلہ دیش سے ہارنے کے بعد اب بڑی جیت کی ضرورت تھی تاکہ وہ اگلے راؤنڈ میں جگہ بنا سکے۔ دوسری جانب نیپال کی ٹیم نے ابھی تک ٹی-20 ورلڈ کپ کا کوئی میچ نہیں جیتا ہے۔

گروپ ڈی کے اس منسوخ ہونے والے میچ نے افریقہ کے لیے سپر 8 کی راہ سب سے پہلے ہموار کر دی۔ تاہم یہ بات پہلے سے طے تھی کہ افریقہ سپر-8 کے لیے کوالیفائی کر لے گا، کیونکہ ٹیم اب تک تین میں سے تینوں میچ جیت چکی ہے۔ اس منسوخ ہونے والے میچ کے بعد سری لنکا کی مشکلات میں سب سے زیادہ اضافہ ہوا ہے۔ سری لنکا نے اب تک تین میچ کھیلے ہیں جن میں اسے 2 میں شکست ہوئی ہے اور بقیہ ایک بارش کی وجہ سے منسوخ ہو گیا ہے۔ تین میچوں کے بعد سری لنکا کے پاس صرف ایک پوائنٹ ہے۔ یہاں سے سری لنکا کے لیے سپر 8 کے لیے کوالیفائی کرنا تقریباً ناممکن نظر آتا ہے۔

دوسری جانب نیپال اپنا پہلا میچ ہار گیا تھا اور ٹیم کا دوسرا میچ بارش کی وجہ سے ضائع ہو گیا۔ ایسے میں نیپال کے لیے بھی مشکلات بڑھ گئیں، لیکن ان کے پاس سپر 8 تک پہنچنے کے سری لنکا سے زیادہ امکانات ہیں۔ یہاں سے کوالیفائی کرنے کے لیے نیپال کو اپنے اگلے دو میچوں میں جنوبی افریقہ اور بنگلہ دیش کو شکست دینا ہوگی۔ اس کے علاوہ اسے امید کرنی ہوگی کہ نیدرلینڈز کی ٹیم اپنے آخری دو میچ ہار جائے۔

قابل ذکر ہے کہ فلوریڈا میں مزید 3 میچ کھیلے جانے ہیں لیکن وہاں کا موسم اگلے ہفتے تک خراب رہنے کا امکان ہے۔ ایسے میں یہ دیکھنا دلچسپ ہوگا کہ بارش اگلے 3 میچوں میں مداخلت کرتی ہے یا نہیں۔ یہاں اگلا میچ 14 جون کو امریکہ اور آئرلینڈ کے درمیان کھیلا جائے گا۔ اس کے بعد 15 جون کو ہندوستان اور کینیڈا کے درمیان مقابلہ ہوگا اور پھر اسی گراؤنڈ پر 16 جون کو پاکستان اور آئرلینڈ کے درمیان میچ ہوگا۔