پاکستان نے سنسنی خیز مقابلہ میں انگلینڈ کو شکست دے کر سیریز برابر کر دی

مانچسٹر: محمد حفیظ (86) اور حیدر علی (54) کی نصف سنچریوں کی زبردست اننگز اور وہاب ریاض (دو وکٹ) کی عمدہ بولنگ کی بدولت پاکستان نے منگل کو انگلینڈ کو تیسرے اور آخری سنسنی خیز ٹی ٹونٹی میچ کے آخری اوور میں پانچ رنوں سے ہراکر تین میچوں کی سیریز1-1 سے برابری کرلی، پاکستان اور انگلینڈ کے مابین پہلا میچ بارش کی وجہ سے منسوخ ہوگیا تھا اور دوسرے ٹی 20 میچ میں انگلینڈ نے مضبوط ہدف کا تعاقب کرتے ہوئے پاکستان کو پانچ وکٹوں سے شکست دی تھی۔

ٹاس ہارنے کے بعد پاکستانی ٹیم 32 رنز کے عوض دو وکٹیں گنوا بیٹھی، لیکن اس کے بعد بیٹنگ کے لئے آئے حیدر علی اور محمد حفیظ نے اننگز کو آگے بڑھا یا اور ٹیم نے 20 اوورز میں چار وکٹوں پر 190 رنز کا مضبوط اسکور بنایا۔

حفیظ نے جہاں 52 گیندوں کا سامنا کرتے ہوئے چار چوکوں اور چھ چھکوں کی مدد سے ناقابل شکست 86 رن بنائے وہیں حیدر علی نے 33 گیندوں پر پانچ چوکوں اور دو چھکوں کی مدد سے بیش قیمت 54 رن بنائے۔ حفیظ کو زبردست اننگز کھیلنے پر مین آف دی میچ سے نوازا گیا۔

انگلینڈ کی ٹیم نے ہدف کے تعاقب کا آغاز کیا اور ٹیم 26 رنز کے اسکور پر دو وکٹیں گنوا بیٹھی۔ بیئرسٹو جہاں اپنا کھاتا بھی نہیں کھول سکے وہیں ڈی جے مالن بھی صرف سات رن بنا کر آؤٹ ہوگئے۔ کپتان ایون مورگن اس میچ میں کچھ خاص نہیں کرسکے اور وہ دس رنز کے ذاتی اسکور پر رن ​​آؤٹ ہوگئے۔

کپتان مورگن کے بعد بیٹنگ کرنے آئے معین علی چوکوں اور چھکوں کی بارش کرتے ہوئے ٹیم کو میچ میں واپس لائے اور ایک وقت ایسا بھی آیا جب معین علی ٹیم اور سیریز جیتنے کے بہت قریب تھے لیکن تجربہ کار وہاب ریاض کی عمدہ بولنگ نے ان کے منصوبہ کو ناکام بنادیا اور وہ 18.5 اوورز میں آؤٹ ہوگئے۔

معین علی نے عمدہ بیٹنگ کرتے ہوئے صرف 33 گیندوں میں چار چوکوں اور چار چھکوں کی مدد سے 61 رنز بنائے جبکہ اننگ کی شروعات کرنے آئے ٹی بیٹن نے آٹھ چوکوں کی مدد سے 31 گیندوں میں 46 رنز بنائے۔ اس کے علاوہ کپتان بابر اعظم نے 18 گیندوں میں تین چوکوں کی مدد سے 21 رنز بنائے جبکہ فخر زمان صرف ایک رن پر معین علی کا شکارہو گئے۔ شاداب عالم نے 15 اور عماد وسیم نے ناٹ آؤٹ چھ رن بنائے۔

پاکستان کی جانب سے وہاب ریاض نے چار اوورز میں 26 رن پر دو وکٹیں، شاہین شاہ آفریدی نے چار اوورز میں 28 رن پر دو وکٹیں لیں جبکہ عماد وسیم نے چار اوورز میں 35 رنز، حارث رؤف نے چار اوورز میں 41 رنز اور شاداب خان نے چار اوور میں 48 رنز دیئے۔ انگلینڈ کی جانب سے کرس جورڈن نے چار اوورز میں 29 رن دے کر دو وکٹیں حاصل کیں۔