مشکل میں سچن تندولکر، کیٹ نے پوچھا سوال 'پیسہ بڑا یا ملک؟'

مایہ ناز سابق ہندوستانی کرکٹر سچن تندولکر کو چینی سرمایہ کاری والی مشہور کمپنی 'پے ٹی ایم فرسٹ گیم' کے برانڈ امبیسڈر بننے پر سخت تنقید کا سامنا کرنا پڑ رہا ہے۔ کنفیڈریشن آف آل انڈیا ٹریڈرس (کیٹ) نے سچن سے ناراضگی ظاہر کرتے ہوئے کہا ہے کہ موجودہ غیر معمولی صورت حال میں جب چین کے ساتھ ہندوستان ایک طرح سے سرد جنگ کا سامنا کر رہا ہے، ایسے میں سچن کا کسی بھی بڑی چینی سرمایہ کاری والی کمپنی کا برانڈ امبیسڈر بننا صاف طور پر ان کی زیادہ رقم کمانے کے لالچ کو ظاہر کرتا ہے۔ کیٹ نے سچن تندولکر کی اس معاملے میں سخت تنقید کی اور آگے کہا کہ ان کو ملک کو یہ جواب دینا چاہیے کہ پیسہ بڑا ہے یا ملک بڑا ہے؟

قابل ذکر ہے کہ پے ٹی ایم فرسٹ گیم کا برانڈ امبیسڈر بنائے جانے کے بعد سچن تندولکر کو کیٹ کے ساتھ ساتھ ملک بھر کے کاروباری طبقہ اور اپنے شیدائیوں کی ناراضگی بھی برداشت کرنی پڑ رہی ہے۔ کیٹ نے تو اس سلسلے میں سچن تندولکر کو خط لکھ کر اپنا فیصلہ بدلنے کی گزارش بھی کی ہے۔ اس کا کہنا ہے کہ اتوار تک ان کے جواب کا انتظار کیا جائے گا، ورنہ اگلے ہفتہ ملک بھر میں اس ایشو پر سچن کے رویہ کے خلاف مظاہرے ہوں گے۔

کیٹ کے قومی جنرل سکریٹری پروین کھنڈیلوال نے بتایا کہ ایک طرف ملک میں ایک بڑی چینی کمپنی ہندوستان میں جاسوسی کرتی ہوئی پکڑی جا رہی ہے۔ ہندوستان میں صدر اور وزیر اعظم سمیت تقریباً 10 ہزار اہم لوگوں پر چینی کمپنیاں لگاتار جاسوسی نظر رکھ رہی ہیں، جو ہندوستان کے تئیں چین کے غلط ارادوں کو واضح کرتا ہے۔ وہیں دوسری طرف سچن تندولکر، جو اپنے آپ کو ہندوستان کا بیٹا کہتے ہیں، انھیں چینی سرمایہ کاری والی کمپنی کا برانڈ امبیسڈر بننے میں کوئی شرم نہیں ہے۔ جس ملک کے لوگوں نے انھیں سر آنکھوں پر بٹھایا، عزت دی اور پیسہ دیا وہ سچن اب ہندوستانی باشندوں کے یقین کی بے عزتی کرتے ہوئے چینی کمپنی کا برانڈ امبیسڈر بنے ہیں۔"

کھنڈیلوال نے کہا کہ اشتہار میں آنے والی ہستیاں ایک طرح سے ہمارے نوجوانوں کے لیے رول ماڈل ہیں۔ ہمارے نوجوان ان اداکاروں کو دیکھ کر ان کی نقل کرنا چاہتے ہیں، ان کی طرح بننا چاہتے ہیں۔ اس لیے جو بھی شخص سماجی زندگی سے جڑا ہے، اس کا رویہ اعلیٰ معیاری ہونا ضروری ہے اور یہاں سچن تندولکر فیل ہو گئے ہیں۔