ہندوستانی کرکٹر ملک کے لیے کھیلنا پسند کرتے ہیں یا فرنچائزی کے لیے؟ گنگولی نے پیش کی بے باک رائے

آئی پی ایل کی بڑھ رہی شہرت کے درمیان کئی بار ایسے سوال اٹھے ہیں کہ اب بڑے کھلاڑی اپنے ملک کے لیے کھیلنے کی جگہ فرنچائزی کے لیے کھیلنا زیادہ پسند کرتے ہیں۔ ایسا اس لیے کیونکہ فرنچائزی کرکٹ میں پیسہ بہت زیادہ ہے۔ اس تعلق سے بی سی سی آئی چیف اور ہندوستانی کرکٹ ٹیم کے سابق کپتان سورو گنگولی نے اپنی بے باک رائے سامنے رکھی ہے۔ انھوں نے کہا ہے کہ ’’ملک کے لیے کھیلنا کسی بھی کھلاڑی کے لیے بہت بڑی بات ہوتی ہے۔ اگر کوئی کھلاڑی اپنے ملک کی نمائندگی کر رہا ہے تو مجھے نہیں لگتا کہ وہ فرنچائزی کرکٹ کو زیادہ توجہ دے گا۔‘‘

سورو گنگولی کا کہنا ہے کہ ’’ہندوستانی کھلاڑی آئی پی ایل یا پھر فرنچائزی کرکٹ کو زیادہ توجہ نہیں دیتے ہیں، میں اس بات کو پورے یقین کے ساتھ کہہ سکتا ہوں۔ ہندوستان میں فرنچائزی کرکٹ کی جگہ کھلاڑی ملک کے لیے کھیلنا پسند کرتے ہیں۔‘‘ وہ مزید کہتے ہیں کہ ’’میں اس بات کو لے کر پراعتماد ہوں کہ ہندوستانی کھلاڑیوں کی ترجیح ہمیشہ ملک کے لیے کھیلنے کو لے کر رہے گی اور اس جذبہ کو فرنچائزی کرکٹ متاثر نہیں کر سکتی۔‘‘

واضح رہے کہ لگاتار ایسے سوال اٹھ رہے ہیں کہ فرنچائزی کرکٹ کی بڑھتی تعداد کے درمیان کرکٹرس اپنے ملک کے لیے کھیلنے کو دستیاب نہیں ہیں۔ کئی بار ایسا دیکھا گیا ہے کہ کچھ ممالک کے کرکٹرس آئی پی ایل میچ کی وجہ سے اپنے ملک کے بین الاقوامی ٹورنامنٹس میں شرکت نہیں کر پاتے ہیں۔ پاکستان نے گزشتہ دنوں یہ بات کہی بھی تھی کہ آئی پی ایل میں میچوں کی تعداد بڑھنے کی وجہ سے دو فریقی یا سہ فریقی ٹورنامنٹ کھیلنے میں کئی بار دقتیں پیش آتی ہیں۔ کئی کھلاڑی اپنے ملک کے لیے کھیلنے سے کہیں زیادہ آئی پی ایل کھیلنے کو ترجیح دیتے ہیں۔