پہلا ون ڈے مقابلہ: روہت، کوہلی، شکھر سب ناکام، بنگلہ دیش نے ٹیم انڈیا کو 186 رن پر کیا ڈھیر

ڈھاکہ: ہندوستان اور بنگلہ دیش کے درمیان پہلے ون ڈے میں ہندوستانی بلے باز کچھ خاص نہ کر سکے اور پوری ٹیم 186 رنز پر ڈھیر ہو گئی۔ بہترین بلے باز وراٹ کوہلی، روہت شرما اور شیکھر دھون سے دھماکہ دار اننگ کھیلنے کی امید تھی لیکن تینوں کچھ خاص نہیں کر سکے۔ نیوزی لینڈ کے خلاف ون ڈے سیریز میں بہتر کارکردگی کا مظاہرہ کرنے والے شریئس ائیر کا بیٹ بھی کام نہ کر سکا اور صرف کے ایل راہل ہی کچھ بہتر کھیل سکے۔

ٹاس ہارنے کے بعد ٹیم انڈیا کے لئے کپتان روہت شرما اور شیکھر دھون اوپننگ کے لیے میدان میں اترے اور دونوں ہی سستے میں آؤٹ ہو گئے۔ شیکھر دھون سب سے پہلے چلتے بنے۔ دھون کو اسپنر مہدی حسن نے بولڈ آؤٹ کیا۔ دھون نے 7 رنز بنانے کے لیے 17 گیندیں کھیلیں۔ جب دھون آؤٹ ہوئے تو اس وقت ہندوستان کا اسکور 23 رنز تھا۔

شیکھر دھون کے آؤٹ ہونے کے بعد شائقین کو روہت و راہل سے اچھی اننگز کھیلنے کی امید تھی لیکن دونوں امیدوں پر کھرے نہیں اترے اور اننگز کے 11ویں اوور میں ثاقب الحسن کا شکار بنے۔ ثاقب نے پہلے روہت شرما کو بولڈ کیا۔ پھر ایک گیند کے بعد وراٹ کوہلی کو بھی لٹن داس کے ہاتھوں کیچ آؤٹ کرا دیا۔ روہت شرما نے 27 اور کوہلی نے 9 رنز بنائے۔

تین وکٹوں کے گرنے کے بعد کے ایل راہل اور شریئس ایئر کے درمیان 43 رنز کی شراکت ہوئی لیکن اس شراکت کو عبادت حسین نے توڑا، شریئس نے 24 رنز کی اننگز کھیلی۔ شریئس کے جانے کے بعد واشنگٹن سندر اور کے ایل راہل نے 60 رنز کی شراکت داری کرکے اننگز کو سنبھالنے کی کوشش کی لیکن ثاقب اور عبادت حسین نے لگاتار وکٹیں لے کر ہندوستانی ٹیم کی کمر توڑ دی۔

ہندوستانی ٹیم کی جانب سے کے ایل راہل نے سب سے زیادہ 73 رنز بنائے۔ راہل نے یہ 73 رنز 70 گیندوں میں بنائے جس میں پانچ چوکے اور چار چھکے شامل تھے۔ بنگلہ دیش کی جانب سے ثاقب الحسن نے سب سے زیادہ پانچ وکٹیں حاصل کیں جبکہ عبادت حسین نے چار کھلاڑیوں کو آؤٹ کیا۔