فاکسکون کے بعد ایئربس پروجیکٹ سے بھی مہاراشٹر محروم، ایک بار پھر گجرات کی جھولی ہوئی مالا مال!

مہاراشٹر میں جب سے ایکناتھ شندے-دیویندر فڈنویس حکومت بنی ہے، تب سے اب تک مہاراشٹر میں لگنے والے تقریباً 1.50 لاکھ روزگار پیدا کرنے والے کئی پروجیکٹس یا تو گجرات یا پھر کسی دیگر بی جے پی حکمراں ریاستوں کو دے دیے گئے ہیں۔ تازہ معاملہ ٹاٹا-ایئربس کے مشترکہ پلانٹ کے طور پر سی-295 فوجی ایئرکرافٹ مینوفیکچرنگ پروجیکٹ سے متعلق ہے جو مہاراشٹر کی جگہ گجرات بھیج دیا گیا ہے۔ ایک اندازے کے مطابق اس پروجیکٹ سے تقریباً 6000 روزگار پیدا ہو سکتے تھے۔

ویسے یہ پہلا موقع نہیں ہے جب مہاراشٹر کے حصے میں آئے پروجیکٹ دوسری ریاستوں کو دے دیے گئے ہیں۔ اس سے قبل تقریباً ایک لاکھ روزگار پیدا کرنے والا اور تقریباً 1.54 لاکھ کروڑ کی لاگت والا ویدانتا-فاکسکون پروجیکٹ بھی مہاراشٹر سے لے کر گجرات بھیج دیا گیا تھا۔ ایک اندازے کے مطابق اس پروجیکٹ سے مہاراشٹر میں تقریباً ایک لاکھ روزگار پیدا ہو سکتے تھے۔ اسی طرح تقریباً 3000 کروڑ کی لاگت سے بننے والے ’بلک ڈرگ پارک‘ کو بھی بی جے پی حکمراں ہماچل پردیش بھیج دیا گیا۔ اس پروجیکٹ سے بھی تقریباً 50 ہزار روزگار پیدا ہو سکتے تھے۔

یکے بعد دیگرے چار بڑے صنعتی پروجیکٹ مہاراشٹر کے ہاتھ سے پھسلنے کے بعد ایکناتھ شندے-دیویندر فڈنویس حکومت لگاتار شرمندگی کا سامنا کر رہی ہے۔ اور، اب تو حکومت کے وزیر ہی اس سلسلے میں سوال اٹھانے لگے ہیں۔ حال کے دنوں میں مہاراشٹر میں لگنے والے تقریباً 1.40 لاکھ کروڑ کے پروجیکٹ گجرات چلے گئے ہیں۔

تازہ معاملہ ٹاٹا-ایئربس سی-295 ٹرانسپورٹ ایئرکرافٹ مینوفیکچرنگ سے جڑا پروجیکٹ سے متعلق ہے۔ تقریباً 22000 کروڑ روپے کا یہ پروجیکٹ بھی گجرات سے چلا گیا ہے۔ حالت یہ ہے کہ مہاراشٹر کے وزیر صنعت ادئے سامنت نے کھل کر کہا ہے کہ نائب وزیر اعلیٰ دیویندر فڈنویس نے تو ناگپور میں لگنے والے اس پروجیکٹ کو ریاست سے باہر نہ جانے دینے کے لیے کافی کوشش کی لیکن ایسا نہیں ہو سکا۔

سامنت کا بیان آنے کے کچھ ہی دیر بعد شندے گروپ والی شیوسینا کے رکن اسمبلی نے دعویٰ کیا کہ مرکزی حکومت نے گزشتہ سال ستمبر میں ٹاٹا-ایئربس پروجیکٹ کو گجرات میں قائم کرنے کا سمجھوتہ کیا تھا۔ لیکن سامنت نے پورے معاملے میں کشمکش کی حالت سامنے آنے کے لیے جہاں اپوزیشن کو ذمہ دار ٹھہرایا وہیں اس کا قصور بھی اپوزیشن پر ہی ڈال دیا۔ یہاں بتانا ضروری ہے کہ ابھی گزشتہ ماہ ستمبر میں ہی سامنت نے کہا تھا کہ ٹاٹا-ایئربس پروجیکٹ ناگپور کے میہان میں لگے گا۔

واضح رہے کہ سی-295 ایئرکرافٹ کی مینوفیکچرنگ اب ایئربس اور ٹاٹا ایڈوانس سسٹمز لمیٹڈ کے جوائنٹ پلانٹ کے ذریعہ کیا جائے گا۔ اور اب یہ پروجیکٹ گجرات کے وڈودرا میں لگ رہا ہے۔ معاہدہ کے مطابق حکومت ہند نے 2021 میں ایئربس کے ساتھ 56 سی-295 فوجی ٹرانسپورٹ ایئرکرافٹ کا معاہدہ ایئرب کے ساتھ کیا تھا۔ ان میں سے 40 کی مینوفیکچرنگ ہندوستان میں ہی ہونی ہے۔ سرکاری اعلان کے مطابق 16 ایئرکرافٹ اسپین سے اائیں گے جو استعمال کے لیے تیار ہوں گے۔ ان ایئرکرافٹ کی ڈیلیوری معاہدہ ہونے کے 48 ماہ کے اندر ہونی ہے۔

اس پروجیکٹ کو مہاراشٹر میں لگانے کے لیے وزیر اعلیٰ ایکناتھ شندے اور نائب وزیر اعلیٰ دیویندر فڈنویس کو وزیر اعظم نریندر مودی سے ملنا تھا۔ لیکن یہ ملاقات نہیں ہو سکی اور اس سے پہلے کہ مہاراشٹر اس پروجیکٹ کو اپنے یہاں لگانے کے لیے کوئی اور کوشش کرتا، اس پروجیکٹ کو بھی بی جے پی حکمراں گجرات بھیج دیا گیا، جہاں اگلے ماہ اسمبلی انتخاب ہونے ہیں۔ ماہرین کے اندازے کے مطابق اس پروجیکٹ سے مقامی سطح پر کم از کم 6000 بلاواسطہ اور بالواسطہ ملازمتیں پیدا ہوں گی۔

اس پروجیکٹ کے گجرات جانے پر مہاوکاس اگھاڑی حکومت میں سابق وزیر اور ادھو ٹھاکرے گروپ کی شیوسینا کے لیڈر آدتیہ ٹھاکرے نے سوال اٹھایا ہے۔ انھوں نے ایک ٹوئٹ میں کہا کہ ’’کھوکے حکومت نے ایک اور پروجیکٹ مہاراشٹر کے باہر جانے دیا۔ میں جولائی ماہ سے لگاتار مطالبہ کر رہا ہوں کہ ’ٹاٹا ایئربس پروجیکٹ‘ مہاراشٹر سے باہر نہ جائے، یہ یقینی کرنے کی کوشش کیے جائیں۔ لیکن یہ پھر سے ہوا۔ مہاراشٹر میں گزشتہ تین مہینوں سے لگاتار پروجیکٹس کیوں باہر جا رہے ہیں؟‘‘ انھوں نے مزید کہا کہ ’’یہ دیکھا جا سکتا ہے کہ صنعت کو کھوکے حکومت پر کوئی بھروسہ نہیں ہے۔ مہاراشٹر سے 4 پروجیکٹ نکل جانے کےب عد بھی کیا وزیر صنعت استعفیٰ دیں گے؟‘‘

آدتیہ ٹھاکرے نے یاد دلایا کہ ٹاٹا گروپ کے سربراہ این چندرشیکھرن کے ساتھ اپنی دو میٹنگوں کے دوران انھوں نے اور سابق وزیر صنعت سبھاش دیسائی نے پروجیکٹ کو مہاراشٹر میں قائم کرنے پر زور دیا تھا۔ این سی پی کی مہاراشٹر یونٹ کے مہیش تاپسے نے بھی کہا ہے کہ مہاراشٹر کے مفادات کی حفاظت کرنے میں ناکام رہنے کے لیے برطانیہ کے وزیر اعظم لز ٹرس کی طرح وزیر اعلیٰ ایکناتھ شندے کو بھی استعفیٰ دینا چاہیے۔