عام بجٹ 2022: کیا عام بجٹ میں معیشت کو پٹری پر لانے کی کوشش ہوگی؟

نئی دہلی: وزیر خزانہ نرملا سیتارمن آج صبح گیارہ بجے عام بجٹ پیش کریں گی۔ کورونا وبا کی وجہ سے قومی معیشت کی حالت اچھی نہیں ہے اور کئی شعبے بہت بری طرح متاثر ہیں، اس لئے وزیر خزانہ کے لئے قومی معیشت کو پٹری پر لانا ایک بڑا چیلنج ہوگا۔

ویسے تو لوگوں کی اس پر بھی نظر رہے گی کہ عام بجٹ میں ان پانچ ریاستوں کے لئے کیا کچھ خاص ہوگا جہاں اسمبلی انتخابات ہونے جا رہے ہیں لیکن کئی شعبے ایسے ہیں جن کے تعلق سے کہا جا رہا ہے کہ بجٹ سفارشات پر حکومت کی ان پر خصوصی توجہ ہوگی۔

یہ اندازے لگائے جا رہے ہیں کہ اس بجٹ میں کسانوں اور متوسط کاروبار پر توجہ رہنے کے امکانات ہیں۔ اس کی ضرورت ہے لیکن اس کو ناقدین انتخابات کے نظریہ سے بھی دیکھیں گے۔ کسان پینشن اسکیم کے بجٹ میں اضافہ کیا جا سکتا ہے۔ دوسری جانب منریگا کے بجٹ میں اضافہ کیا جا سکتا ہے۔ ادھر مڈل کلاس کے لوگوں کو امید ہے کہ انکم ٹیکس کی حد میں انہیں چھوت مل سکتی ہے۔

اس میں کوئی دو رائے نہیں کہ وبا کی وجہ سے سیاحت سے جڑے تما م شعبے بری طرح متاثر ہوئے ہیں اور حکومت کو ان کو راحت دینا سب سے بڑی ذمہ داری ہے۔ دوسری جانب نوٹ بندی اور وبا سے متوسط کاروبار بری طرح متاثر ہوئے ہیں اس لئے حکومت کو اس جانب بھی توجہ دینے کی ضرورت ہے۔