نرملا سیتارمن آج عام بجٹ پیش کریں گی، کیا یہ انتخابی بجٹ ہوگا؟

ملک کی پانچ ریاستوں میں اسمبلی انتخابات ہونے جا رہے ہیں اور ان انتخابات کو عام انتخابات سے پہلے سیمی فائنل کہا جارہا ہے ، ایسے ماحول میں ملک کی وزیر خزانہ نرملا سیتارمن آج عام بجٹ پیش کریں گی۔کورونا وبا کی وجہ سے قومی معیشت بہت بری طرح متاثر ہے ایسے میں یہ دیکھنا ہو گا کہ حکومت کی ترجیحات کیا رہیں گی اور بجٹ سفارشات میں ایسا کیا ہوگا جس سے معیشت پٹری پر واپس آ جائے۔

بجٹ اجلاس کے پہلے دن حکومت نے جو اقتصادی جائزہ پیش کیا ہے اس سے قومی معیشت کا کچھ تو اندازہ ہو گیا ہے اور جس طرح کا رد عمل حزب اختلاف کا سامنےآ یا ہے اس سے یہ واضح ہے کہ معیشت کا حال اچھا نہیں ہے۔پانچ ریاستوں میں اسمبلی انتخابات ہیں اس لئے مبصرین کی اس پر بھی نظر رہے گی کہ ان سفارشات میں ان ریاستوں کے لئےکیا کیا اعلانات ہوتےہیں۔

واضح رہے آج صبح 11 بجے وزیر خزانہ نرملا سیتارمن سال 2022-23 کا عام بجٹ پیش کریں گی۔ وزیر خزانہ پہلے صبح نو بجے راشٹرپتی بھون جائیں گی جہا ں وہ صدر جمہوریہ کو بجٹ سفارشات کے بارے میں بتائیں گی پھر وہ مرکزی کابینہ سے بجٹ سفارشات کے تعلق سے ملاقات کریں گی جس کے بعد وہ بجٹ پیش کرنے کے لئے پارلیمنٹ کے لئے روانہ ہو جائیں گی۔