مرکزی حکومت کا بجٹ عوام کے ساتھ دھوکہ: کمل ناتھ

بھوپال: کانگریس کے سینئر لیڈر اور سابق وزیر اعلیٰ کمل ناتھ نے کہا کہ مرکزی حکومت کا آج پیش ہونے والے عام بجٹ میں کسی بھی طبقے کے لیے کچھ نہیں ہے۔ کمل ناتھ نے اپنے ردعمل کا اظہار کرتے ہوئے کہا کہ مرکزی حکومت کا آج پیش عام بجٹ پوری طرح سے مایوس کن ثابت ہوا ہے۔ محض اعداد و شمار کی بازی گری سے بھرا اور ایک بار پھر جھوٹے خواب دکھانے والا ثابت ہوا ہے۔ اس بجٹ میں کسی بھی طبقے کے لیے کچھ نہیں ہے۔

انہوں نے کہا کہ عام لوگ عرصہ دراز سے انکم ٹیکس سلیب میں چھوٹ بڑھانے کا مطالبہ کر رہے تھے لیکن کوئی راحت نہیں دی گئی۔ انہوں نے کہا کہ تین زرعی قوانین منسوخ ہونے کے بعد کسان ایم ایس پی پر گارنٹی کا مطالبہ کر رہے تھے، لیکن ایم ایس پی کی گارنٹی پر اس بجٹ میں کوئی بات نہیں کی گئی، سنہ 2022 تک کسانوں کی آمدنی دوگنی کرنے کے جو جھوٹے خواب دکھائے گئے تھے، اس پر بھی آج کوئی بات نہیں۔

کمل ناتھ نے سوالیہ لہجے میں کہا کہ 7 سال پہلے ہر سال دو کروڑ نوکریاں دینے کا خواب دکھانے والے اب بھی 60 لاکھ نئی نوکریاں پیدا کرنے کے جھوٹے خواب دکھا رہے ہیں۔ جب یہ حقیقت سامنے آچکی ہے کہ مہنگائی میں اضافے کی بڑی وجہ ایندھن کی بڑھتی ہوئی قیمتیں ہیں تو پھر کیا وجہ ہے کہ اس کے بعد بھی پٹرول اور ڈیزل پر لگنے والے ٹیکسوں میں کوئی راحت نہیں۔ مہنگائی سے نجات کے لیے بجٹ میں کچھ نہیں۔

کمل ناتھ نے کہا کہ اسکولوں کی عمارتیں نہیں، اسکولوں میں بجلی نہیں، اساتذہ نہیں، پانی نہیں اور اب اسکولوں میں ہر کلاس میں ٹی وی لگانے کے جھوٹے خواب دکھائے جا رہے ہیں۔ انہوں نے کہا کہ ریل کے مسافر کرایوں اور مال برداری کے کرایوں میں زبردست اضافہ کے بعد اب نئی ٹرینوں کے خواب دکھائے جا رہے ہیں۔

کمل ناتھ نے کہا کہ اس بجٹ میں کسانوں، نوجوانوں، خواتین، نوکری پیشہ طبقے اور متوسط ​​طبقے کسی کے لیے کچھ نہیں ہے۔ یہ بجٹ کسان مخالف، نوجوان مخالف، عوام مخالف ہے۔ انہوں نے کہا کہ جو چند اعلانات بجٹ میں کئے گئے ہیں وہ بھی پانچ ریاستوں میں ہونے والے انتخابات کو مدنظر رکھتے ہوئے کئے گئے ہیں۔ انہوں نے بتایا کہ سات سال بعد بھی اگلے 25 سال کے جھوٹے خواب دکھائے جا رہے ہیں۔ آج پیش کیے جانے والے عام بجٹ سے عوام کو شدید مایوسی ہوئی ہے اور یہ بجٹ عوام کے ساتھ دھوکہ ثابت ہوا ہے۔