سوشانت کو زہر نہیں دیا گیا! ایمس کے ڈاکٹروں نے خارج کیا امکان: ذرائع

نئی دہلی: سوشانت سنگھ راجپوت موت کے سلسلہ میں دہلی ایمس کے ڈاکٹروں کے ایک پینل نے سی بی آئی کو اپنی رپورٹ سون دی ہے۔ ذرائع کے حوالہ سے میڈیا رپورٹ میں کہا گیا ہے کہ سوشانت کی موت زہر دینے سے نہیں ہوئی تھی۔ واضح رہے کہ ممبئی پولیس نے اپنی پورٹ میں سوشانت کی موت کو خودکشی قرار دیا تھا، تاہم سوشانت کے اہل خانہ اور ان کے مداحوں کی طرف سے لگاتار زہر دینے کے الزامات عائد کیے جا رہے ہیں۔ زہر دینے کا الزام لگانے والوں نے ممبئی پولیس کو ہدف تنقید بھی بنایا تھا۔

خیال رہے کہ 34 سالہ سوشانت راجپوت کی لاش 14 جون کو مشکوک حالات میں ان کے ممبئی واقع اپارٹمنٹ سے برآمد ہوئی تھی۔ ممبئی پولیس نے پوسٹ مارٹم کی بنیاد پر موت کو خودکشی قرار دیا تھا، لیکن سوشل میڈیا پر قتل کے حوالے سے بحث شروع ہو گئی اور سوشانت کو انصاف دلانے کی مہم بھی شروع کر دی گئی۔

اس کے بعد سوشانت کی گرل فرینڈ ریا چکرورتی پر سوشانت کے اہل خانہ نے کئی الزامات عائد کیے۔ پہلے ای ڈی نے اس معاملہ میں جانچ کی اور بعد میں اس معاملہ کی تحقیقات سی بی آئی کے ہاتھ میں چلی گئی اور پھر منشیات کا زاویہ بھی پیدا ہو گیا۔ اس کے بعد انسداد منشیات بیورو (این سی بی) نے ریا چکرورتی اور ان کے بھائی کے علاوہ متعدد افراد کو گرفتار کر لیا اور جانچ کی تپش کئی اہم اداکاراؤں کے دامن تک پہنچ گئی۔ اس معاملہ میں دیپیکا پادوکون، شردھا کپور اور سارہ علی خان سے پوچھ گچھ ہو چکی ہے۔

ذرائع نے بتایا ہے کہ ایمس پینل نے پوسٹ مارٹم انجام دینے والے ممبئی اسپتال کے عملے کی جانب سے کچھ بے ضابطگیاں کرنے کا معاملہ بھی اٹھایا ہے۔ سوشانت کے اہل خانہ اور کچھ دوستوں نے اس بارے میں سوالات اٹھائے کہ ان کی موت کیسے ہوئی۔ اہل خانہ نے ریا چکرورتی پر سوشانت کو تشدد کا نشانہ بنانے، اسے بغیر علم کے دوائیں دینے، پیسے کے لئے اس کا استحصال کرنے اور اس کی موت میں کردار ادا کرنے کا الزام عائد کیا تھا۔ ابھی پچھلے ہفتے ہی اس کنبہ کے وکیل وکاس سنگھ نے دعوی کیا تھا کہ ایمس پینل میں موجود ایک ڈاکٹر نے انہیں بتایا تھا کہ سوشانت سنگھ کا گلا گھونٹا گیا تھا۔

انہوں نے ایک ٹوئٹ میں لکھا، 'سی بی آئی کے خود بخود ایس ایس آر کے قتل میں خودکشی کو تبدیل کرنے کے فیصلے میں تاخیر سے مایوسی بڑھ رہی ہے۔ ایمس ٹیم کے ایک ڈاکٹر نے بہت پہلے بتایا تھا کہ میں نے جو تصاویر بھیجی ہیں ان سے 200 فیصد ایسا لگتا ہے کہ موت گلا گھونٹ کر کی گئی ہے۔

اس دعوے کے بعد ریا چکرورتی کے وکیل نے ایک نئے میڈیکل بورڈ سے مطالبہ کیا تھا کہ وہ تحقیقات کو غیر جانبدارانہ اور مداخلت سے محفوظ رکھیں۔ تاہم ، پیر کے روز سی بی آئی نے ایک بیان جاری کرتے ہوئے کہا کہ سی بی آئی اس معاملے کی پیشہ ورانہ انداز میں تحقیقات کر رہی ہے، جہاں ہر پہلو سے تحقیقات کی جا رہی ہے۔

ذرائع کا کہنا ہے کہ زہر دینے کو خارج الامکانات کیے جانے کے باوجود سی بی آئی خود کشی کے لئے اکسانے والے الزامات کے سلسلہ میں اپنی تحقیقات کو جاری رکھ سکتی ہے۔ ممبئی پولیس نے اپنے مقدمہ میں ان الزامات کو بھی شمار کیا ہے۔ ذرائع کا مزید کہنا ہے کہ ایمس ڈاکٹروں کے پینل نے پوسٹ مارٹم کرنے والے ممبئی اسپتال کے عملے کی طرف بھی گڑبڑی کیے جانے کا مسئلہ اٹھایا ہے۔