سلمان خان کے بھائیوں سہیل خان اور ارباز خان کے خلاف ممبئی پولیس نے درج کیا مقدمہ

ممبئی: برہن ممبئی مہانگر پالیکا (بی ایم سی) نے اداکار سلمان خان کے بھائیوں سہیل خان اور ارباز خان کے خلاف ایف آئی آر درج کی ہے۔ سہیل کے خلاف دفعہ 188 اور 269 کے تحت مقدمہ درج کیا گیا ہے۔ یہ معاملہ کورونا وائرس پروٹوکول کی خلاف ورزی سے متعلق ہے۔ ایف آئی آر سہیل خان، ارباز خان اور سہیل خان کے بیٹے نروان کے خلاف درج کی گئی ہے۔

ممبئی کے کھار پولیس اسٹیشن میں سہیل خان، ارباز خان سمیت تینوں کے خلاف مقدمہ درج کیا گیا ہے۔ یہ تینوں 25 دسمبرکو دبئی سے ممبئی واپس آئے تھے اس کے بعد انہیں ہوٹل میں قرنطینہ میں رہنے کو کہا گیا تھا لیکن تینوں اپنے گھر چلے گئے۔

ان لوگوں پر بی ایم سی کو غلط معلومات دینے کا بھی الزام ہے۔ سلمان خان کے بھائی اور بھتیجا 25 دسمبر کو یو اے ای سے ممبئی لوٹے تھے اور انہوں نے حلف نامہ دے کر کہا تھا کہ وہ خود کو تاج ہوٹل میں قرنطینہ میں رکھیں گے لیکن وہ تاج ہوٹل میں قرنطینہ میں رہنے کے بجائے یہ لوگ باندرا میں واقع اپنے گھر چلے گئے۔

رپورٹ کے مطابق کووڈ-19 کے نئے اسٹرین کی وجہ سے برطانیہ اور متحدہ عرب امارات سے سفر کر کے آنے والے لوگوں کو 7 دن تک قرنطینہ میں رہنا ضروری ہے اور سہیل خال، ارباز خان اور نروان خان کو 9 جنوری تک قرنطینہ میں رہنا تھا۔