’دی کشمیر فائلز‘ کے بعد وویک اگنیہوتری کی نئی پیشکش ’کشمیر اَن رپورٹیڈ‘، ٹیزر میں نظر آئے روتے سسکتے لوگ

بالی ووڈ کی متنازعہ فلم ’دی کشمیر فائلز‘ کے بعد وویک اگنیہوتری ایک بار پھر کشمیری پنڈت کے ایشو پر ہی نیا پروجیکٹ ریلیز کرنے والے ہیں۔ دراصل وویک اگنیہوتری نے فلم ’دی کشمیر فائلس‘ کی فالو اَپ اسٹوری لوگوں کے سامنے لانے کا فیصلہ کیا ہے جو کہ ویب سیریز ہوگا اور ’کشمیر اَن رپورٹیڈ‘ کے نام سے ریلیز کیا جائے گا۔ اس ویب سیریز کا ٹیزر وویک اگنیہوتری نے سوشل میڈیا پلیٹ فارم انسٹاگرام پر جاری کیا ہے اور تقریباً ایک منٹ کی اس ویڈیو میں بہت کچھ دکھانے کی کوشش کی ہے۔ ٹیزر سے ظاہر ہوتا ہے کہ اس ویب سیریز میں کشمیری پنڈتوں کے درد کو ایک بار پھر سے سبھی کے سامنے پیش کرنے کی کوشش ہوگی۔

دراصل فلمساز وویک اگنیہوتری اس مرتبہ ’کشمیر اَن رپورٹیڈ‘ کے ذریعہ ان کشمیری پنڈتوں کی کہانی بیان کرتے نظر آئیں گے جو اصل معنوں میں متاثر ہوئے ہیں۔ اس ویب سیریز میں جو لوگ اس درد سے گزرے ہیں وہ خود اپنی آپ بیتی سناتے دکھائی دیں گے۔ ٹیزر کو شیئر کرتے ہوئے وویک اگنیہوتری نے اپنے کیپشن سے بھی سبھی کا دھیان اپنی طرف کھینچا ہے۔ وویک کے کیپشن کے مطابق جن لوگوں نے ’دی کشمیر فائلس‘ پر سوال کھڑے کیے تھے، انھیں ڈائریکٹر نے ہندوستان کا دشمن لکھا ہے۔ اس کے علاوہ وہ یہ بھی لکھتے ہیں کہ وہ کشمیر میں ہندوؤں کی نسل کشی کی سچی تصویر سبھی کے سامنے لا رہے ہیں۔

اس ویب سیریز کے ٹیزر سے پہلے وویک اگنیہوتری نے اس کا ایک پوسٹر بھی ریلیز کیا تھا۔ پوسٹر شیئر کرتے ہوئے بھی وویک نے یہی کہا تھا کہ وہ ہندوؤں کی نسل کشی کا سچ اس ویب سیریز کے ذریعہ سب کے سامنے لائیں گے۔ یہ ڈاکیومنٹری سیریز او ٹی ٹی پلیٹ فارم زی 5 پر ریلیز کی جائے گی۔