دلیپ کمار اور سائرہ بانو اس سال 11 اکتوبر کو نہیں منائیں گے شادی کی سالگرہ

بالی ووڈ کے مشہور و معروف اداکار دلیپ کمار اور ان کی بیوی سائرہ بانو ہر سال اپنی شادی کی سالگرہ 11 اکتوبر کو تزک و احتشام کے ساتھ مناتے ہیں، لیکن اس سال وہ شادی کی سالگرہ نہیں منائیں گے۔ دلیپ کمار اور سائرہ بانو نے فیصلہ کیا ہے کہ اس سال 11 اکتوبر کو وہ اپنی شادی کی 54ویں سالگرہ نہیں منائیں گے اور اس کے پیچھے کی وجہ ہے دلیپ کمار کے دو چھوٹے بھائیوں کا انتقال۔

دراصل کورونا وبا کی وجہ سے اس سال دلیپ کمار کے دو چھوٹے بھائیوں احسان خان اور اسلم خان اس دنیا سے رخصت ہو گئے۔ یہی وجہ ہے کہ دلیپ-سائرہ نے فیصلہ کیا کہ اس سال وہ شادی کی سالگرہ نہیں منائیں گے۔ اس بات کی جانکاری خود سائرہ بانو نے شوہر دلیپ کمار کے ٹوئٹر ہینڈل سے دی ہے۔

سائرہ بانو نے اپنے ٹوئٹ میں لکھا ہے کہ "11 اکتوبر، ہمیشہ میری زندگی کا سب سے خوبصورت دن ہوتا ہے۔ دلیپ صاحب نے اس دن مجھ سے شادی کی اور میرے خوابوں کو شرمندہ تعبیر کیا۔ لیکن اس سال ہم کوئی جشن نہیں منا رہے ہیں کیونکہ آپ سبھی جانتے ہیں ہم نے اپنے دو بھائیوں احسان بھائی اور اسلم بھائی کو کھو دیا ہے۔"

اس کے بعد سائرہ بانو نے اپنے ایک دیگر ٹوئٹ میں لکھا ہے "کورونا وائرس کے سبب دنیا بھر میں کئی ساری فیملی نے اپنے لوگوں کو کھو دیا ہے۔ 'کووڈ-19' نے کروڑوں لوگوں کی زندگی میں اتھل پتھل مچا دی ہے۔ اس بیماری نے لاکھوں لوگوں کی جان لے لی۔ میرے پیارے شیدائیوں اور سبھی لوگوں سے گزارش ہے کہ وہ اپنا خیال رکھیں۔ سبھی لوگ ساتھ رہیں اور محفوظ رہیں، اللہ سے یہی دعاء ہے۔"