اولمپکس کے فائنل میں پہنچنے والی پہلی پہلوان بنی ونیش پھوگاٹ، ہندوستان کا ایک اور تمغہ یقینی

پیرس: ہندوستانی پہلوان ونیش پھوگاٹ نے پیرس اولمپکس 2024 میں تاریخ رقم کر دی ہے۔ ونیش پھوگاٹ اولمپکس کے فائنل میں پہنچنے والی پہلی ہندوستانی خاتون ریسلر ہیں۔ انہوں نے خواتین کی 50 کلوگرام فری اسٹائل 50 کلوگرام کیٹیگری کے سیمی فائنل میں کیوبا کی یوسنلیس گزمین لوپیز کو 5-0 سے شکست دی۔ ونیش کے فائنل میں پہنچنے کے ساتھ ہی ہندوستان کا تمغہ یقینی ہو گیا ہے۔

قبل ازیں، ونیش پھوگاٹ نے پری کوارٹر فائنل یعنی راؤنڈ آف 16 ریسلنگ مقابلے میں جاپان کی ٹوکیو 2020 کی چیمپئن یوئی سوساکی کو 3-2 سے شکست دی جبکہ کوارٹر فائنل میں انہوں نے 2019 کی یورپی چیمپئن یوکرین کی اوکسانا لیوچ کو 7-2 سے شکست دے کر سیمی فائنل میں جگہ بنائی۔

ونیش پھوگاٹ نے کامن ویلتھ گیمز میں لگاتار 3 گولڈ جیتے ہیں۔ انہوں نے یہ گولڈ 2014 گلاسگو، 2018 گولڈ کوسٹ اور 2022 برمنگھم گیمز میں جیتا تھا۔ اس کے علاوہ ونیش نے 2018 جکارتہ ایشیائی کھیلوں میں بھی طلائی تمغہ جیتا تھا۔ ایشین چیمپئن شپ 2021 میں بھی گولڈ میڈل جیتا تھا۔

اس کے علاوہ انہوں نے ایشین چیمپئن شپ میں 3 چاندی کے تمغے بھی جیتے تھے۔ ونیش پھوگاٹ اب تک عالمی چمپئن شپ میں صرف دو بار کانسی کا تمغہ جیتنے میں کامیاب ہوئی ہیں۔ اب اس نے اولمپکس میں بھی تمغے کو یقینی بنایا ہے اور تمام ہندوستانیوں کو امید ہے کہ وہ طلائی تمغہ ہی جیتیں گی۔

خیال رہے کہ ہندوستان نے اب تک پیرس اولمپکس میں 3 تمغے اپنے نام کیے ہیں۔ تینوں ہی تمغے کانسے ہیں اور تینوں ہی ہندوستانی شوٹروں نے جیتے ہیں۔ دو تمغے منو بھاکر نے جیتے ہیں، ایک انہوں نے سنگل مقابلہ میں جبکہ دوسرا سربجوت سنگھ کے ساتھ مل کر جیتا۔ جبکہ تیسرا تمغہ سوپنل کوسالے نے اپنے نام کیا ہے۔